കണ്ണൂർ: യുവാവിനെ കിണറ്റിൽ മരിച്ച നിലയിൽ കണ്ടെത്തി. കണ്ണൂർ കീഴ്പ്പള്ളി പുതിയങ്ങാടിയിലെ കൊട്ടാരത്തിൽ ബിജുവിനെയാണ് വീടിന് സമീപത്തെ കിണറ്റിൽ മരിച്ച നിലയിൽ കണ്ടെത്തിയത്. 38 വയസായിരുന്നു. മൃതദേഹം പോസ്റ്റ്മോർട്ടത്തിനായി പരിയാരം മെഡിക്കൽ കോളജിലേക്ക് മാറ്റി.

ചൊവ്വാഴ്ച രാവിലെ മുതൽ ബിജുവിനെ കാണാതായിരുന്നു. പിന്നീടാണ് ഇരിട്ടി അഗ്നിശമന സേനയുടെ സഹായത്തോടെ പണി കഴിയാത്ത വീടിന് സമീപത്തെ കിണറിൽ മണിക്കൂറുകൾ നീണ്ട തിരച്ചിലിനൊടുവിലാണ് മൃതദേഹം കണ്ടെത്തിയത്. മദ്യപിച്ച് കിണറ്റിൽ വീണതാണെന്നാണ് പ്രാഥമിക നിഗമനമെന്ന് പൊലീസ് പറഞ്ഞു.

10 കോലോളം ആഴമുള്ള കിണറ്റിൽ നാല് കോലോളം വെള്ളമുണ്ടായിരുന്നു. ഫയർഫോഴ്സ് സേനാംഗങ്ങൾ ജീവൻ രക്ഷാ ഉപകരണങ്ങളുടെ സഹായത്തോടെയാണ് കിണറ്റിലെ വെള്ളത്തിൽ തിരച്ചിൽ നടത്തിയത്. ടി മോഹനൻ, വിജീഷ് കെവി, സന്ദീപ് പിആർ, ആദർശ് എ, വിഷ്ണു പ്രകാശ്, പ്രവീൺകുമാർ, രമേശ് കുമാർ, ജോജോ എംഎ തുടങ്ങിയവർ തിരച്ചിലിന് നേതൃത്വം നൽകി.