കൊച്ചി; രോ​ഗവ്യാപനം രൂക്ഷമാകുന്ന എറണാകുളത്ത് അഞ്ച് പുതിയ കണ്ടെയ്ൻമെന്റ് സോണുകൾ കൂടി പ്രഖ്യാപിച്ചു. തുറവൂർ ​ഗ്രാമപഞ്ചായത്തിലെ 4,14 വാർഡുകളും തിരുവാണിയൂർ ​ഗ്രാമപഞ്ചായത്തിലെ ഏഴാം വാർഡും ചേരാനല്ലൂർ ​ഗ്രാമപഞ്ചായത്തിലെ 17ാം വാർഡുമാണ് കണ്ടെയ്ൻമെന്റ് സോണായത്. കൂടാതെ കളമശ്ശേരി ന​ഗരസഭയിലെ ആറാം ഡിവിഷനും കണ്ടെയ്ൻമെന്റ് സോണായി പ്രഖ്യാപിച്ചു. വാഴക്കുളം ​ഗ്രാമപഞ്ചായത്തിലെ വാർഡ് 19നെ കണ്ടെയ്ൻമെന്റ് സോണിൽ നിന്നും ഒഴിവാക്കി.

ജില്ലയിൽ കോവിഡ് വ്യാപനം രൂക്ഷമായി തുടരുകയാണ്. ഇന്നലെ രോ​ഗം സ്ഥിരീകരിച്ച 69 പേരിൽ 61 പേർക്കും സമ്പർക്കത്തിലൂടെയാണ് രോ​ഗബാധയുണ്ടായത്. ചെല്ലാനം, ആലുവ ക്ലസ്റ്ററുകളിലെ സ്ഥിതി ​ഗുരുതമാണ്. കൂടാതെ തൃക്കാക്കരയിലെ കരുണാലയത്തിൽ കൊറോണ പടർന്നു പിടിച്ചതും ആശങ്ക വർധിപ്പിക്കുന്നുണ്ട്. തുടർന്ന് കൊച്ചിയിലെ കെയർ ഹോമുകൾ നിരീക്ഷണത്തിലാക്കാൻ ജില്ലാ ഭരണകൂടം തീരുമാനിച്ചു.