തിരുവനന്തപുരം:കോവിഡ് 19 രോഗലക്ഷണങ്ങളോടെ നിര്‍ബന്ധിത ക്വാറന്റൈനില്‍ കഴിയുന്നവര്‍ ആരോഗ്യവകുപ്പിന്റെ നിബന്ധനകള്‍ പാലിക്കുന്നില്ലെങ്കില്‍ പൊതുജനങ്ങള്‍ക്ക് തിരുവനന്തപുരം കളക്ടറേറ്റ് കണ്‍ട്രോള്‍ റൂമില്‍വിവരമറിയിക്കാം. 1077 എന്ന നമ്പരിലാണ് വിളിച്ചറിയിക്കേണ്ടത്. നിരീക്ഷണത്തിലുള്ളവര്‍ പൊതുസ്ഥലങ്ങളില്‍ ഇറങ്ങിനടക്കുന്നത് ശ്രദ്ധയില്‍പ്പെട്ടാല്‍ ഫോട്ടോയെടുത്ത് വാട്‌സാപ്പില്‍ അയയ്ക്കാവുന്നതാണെന്നും ജില്ലാ ഭരണകൂടം അറിയിച്ചു.

അതേസമയം, സംസ്ഥാനത്ത് പുതുതായി 12 പേര്‍ക്ക് കൂടി കോവിഡ് സ്ഥിരീകരിച്ചതായി മുഖ്യമന്ത്രി പിണറായി വിജയന്‍ അറിയിച്ചു. കാസര്‍കോട് ആറ് പേര്‍ക്കും എറണാകുളം, കണ്ണൂര്‍ എന്നി ജില്ലകളിലുളള 3 പേര്‍ക്ക് വീതവുമാണ് കൊറോണ വൈറസ് ബാധ സ്ഥിരീകരിച്ചതെന്ന് മുഖ്യമന്ത്രി വാര്‍ത്താസമ്മേളനത്തില്‍ പറഞ്ഞു. ഇതോടെ കോവിഡ് രോഗബാധയെ തുടര്‍ന്ന് വിവിധ ആശുപത്രികളില്‍ ചികിത്സയില്‍ കഴിയുന്നവരുടെ എണ്ണം 49ആയി. രോഗം ഭേദമായ മൂന്നുപേരെയും കൂടി കൂട്ടിയാല്‍ കോവിഡ് ബാധിച്ചവരുടെ എണ്ണം സംസ്ഥാനത്ത് 52 ആണ്.