തിരുവനന്തപുരം : കോവിഡ് പ്രതിസന്ധി ചർച്ച ചെയ്യാൻ മുഖ്യമന്ത്രി വിളിച്ച എംപിമാരുടെയും എംഎൽഎമാരുടെയും സംയുക്ത യോ​ഗത്തിൽ പങ്കെടുക്കില്ലെന്ന് കെ മുരളീധരൻ എംപി. എംപിമാരെ കൂടെകൂട്ടിയെന്ന് കാണിക്കാനുള്ള ശ്രമമാണ് മുഖ്യമന്ത്രി നടത്തുന്നത്. രാജ്മോഹൻ ഉണ്ണിത്താൻ, വി കെ ശ്രീകണ്ഠൻ, കെ സുധാകരൻ തുടങ്ങിയവരും പങ്കെടുക്കില്ലെന്ന് അറിയിച്ചിട്ടുണ്ട്. യോ​ഗത്തിൽ എംപിയായ യുഡിഎഫ് കൺവീനർ പങ്കെടുക്കുമെന്നും കെ മുരളീധരൻ പറഞ്ഞു.

എംപിമാരുടെയും എംഎൽഎമാരുടെയും യോ​ഗം ഒന്നിച്ച് വിളിച്ചതിനെയും മുരളീധരൻ വിമർശിച്ചു. ഒന്നിച്ച് യോ​ഗം വിളിച്ചാൽ ചർച്ചയ്ക്ക് സമയം കിട്ടില്ലെന്നും മുരളീധരൻ പറഞ്ഞു. കേരളത്തിലേക്ക് പ്രവാസികളെ കൊണ്ടുവരുന്നതിൽ സർക്കാർ മുൻ​ഗണനാക്രമം തെറ്റിക്കുകയാണ്. ​ഗർഭിണികളെ ഉൾപ്പെടെ മാറ്റിനിർത്തി രാഷ്ട്രീയം നോക്കി ആളുകളെ കൊണ്ടുവരുന്നു. മാഹിയിൽ മരിച്ചയാളോട് മുഖ്യമന്ത്രി കാണിക്കുന്നത് ക്രൂരതയാണ്. കോവിഡ് മരണത്തിൽ രാഷ്ട്രീയം നോക്കരുതെന്നും കെ മുരളീധരൻ ആവശ്യപ്പെട്ടു.

സംസ്ഥാനത്ത് കോവിഡ് പ്രതിരോധനടപടികൾ ചർച്ച ചെയ്യാനാണ് മുഖ്യമന്ത്രി പിണറായി വിജയൻ എംപിമാരുടെയും എംഎൽഎമാരുടെയും യോ​ഗം വിളിച്ചത്.  ചൊവ്വാഴ്ച രാവിലെ പത്തരയ്ക്ക് വീഡിയോ കോൺഫറൻസ് വഴിയാണ് യോ​ഗം നടക്കുക. കേന്ദ്രത്തിൽ നിന്ന് അടക്കം എന്തൊക്കെ നടപടികൾ സ്വീകരിക്കാമെന്ന് എംപിമാരോടും, ഓരോ പ്രദേശത്തിന്റെയും സ്വഭാവം അനുസരിച്ച് പ്രാദേശികമായി എന്താണ് കൂടുതലായി ചെയ്യേണ്ടത് എന്ന് എംഎൽഎമാരോടും ചർച്ച ചെയ്യുമെന്നാണ് മുഖ്യമന്ത്രിയുടെ ഓഫീസ് വിശദീകരിക്കുന്നത്.