പത്തനംതിട്ട: ഗവർണർ ആരിഫ് മുഹമ്മദ് ഖാൻ ശബരിമലയിൽ ദർശനം നടത്തി. ഇന്നലെ വൈകിട്ട് അഞ്ചുമണിയോടെ പമ്പയിൽ നിന്ന് ഇരുമുടി നിറച്ച് സ്വാമി അയ്യപ്പൻ റോഡിലൂടെയാണ് മല കയറിയത്. ഒന്നര മണിക്കൂറെടുത്താണ് ​ഗവർണറും സംഘവും സന്നിധാനത്തെത്തിയത്. ഗവർണർകൊപ്പം ഇളയമകൻ കബീർ മുഹമ്മദ് ഖാനും സന്നിധാനത്തെത്തി. 

നടപ്പന്തലിൽ തിരുവിതാംകൂർ ദേവസ്വം ബോർഡ് പ്രസിഡന്റ് എൻ വാസു, ദേവസ്വം കമ്മീഷണർ ബി എസ് തിരുമേനി എന്നിവർ ഗവർണറെ സ്വീകരിച്ചു. രാത്രി 8 മണിയോടെയാണ് പതിനെട്ടാംപടി കയറി അയ്യപ്പ ദർശനം നടത്തി.  ഇന്ന് പുലർച്ചെ 5ന് നിർമാല്യ ദർശനം നടത്തും. ഇന്ന് സന്നിധാനത്ത് തങ്ങുന്ന ഗവർണർ നാളെ രാവിലെത്തെ ദർശനത്തിനുശേഷം സന്ദർശനത്തിന്റെ ഓർമയ്ക്കായി മാളികപ്പുറം ക്ഷേത്ര പരിസരത്ത് ചന്ദനത്തൈ നടും.