തൊടുപുഴ: ഭർത്താവിനെ കാണാതെ അന്വേഷിച്ചിറങ്ങിയ വീട്ടമ്മ ബൈക്കിടിച്ച് മരിച്ചു. രതീഷ് പ്രസ് ഉടമ നീറണാകുന്നേൽ ചിദംബരത്തിന്റെ ഭാര്യ സുജാതയാണ് (72) മരിച്ചത്. ഇവരുടെ ഭർത്താവ് ചിദംബരത്തെ (75) പിന്നീട് തൂങ്ങി മരിച്ച നിലയിലും കണ്ടെത്തി. സ്വന്തം പ്രസിനു സമീപം കിണറിലെ പൈപ്പിൽ തൂങ്ങി മരിച്ച നിലയിലാണ് ചിദംബരത്തെ കണ്ടെത്തിയത്. 

ഇന്നലെ വൈകീട്ട് ഏഴരയോടെ മൂലമറ്റം ടൗണിനു സമീപമാണ് സുജാത അപകടത്തിൽ മരിച്ചത്. ഭർത്താവ് വീട്ടിൽ മടങ്ങിയെത്താത്തതിനെ തുടർന്ന് അന്വേഷിച്ചു പോയ സുജാതയെ ചേറാടി സ്വദേശി ദിലുവിന്റെ ബൈക്ക് ഇടിക്കുകയായിരുന്നു. ഉടൻ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.

തുടർന്ന് സുജാതയുടെ മരണ വിവരം അറിയിക്കാൻ നാട്ടുകാർ ചിദംബരത്തിനെ അന്വേഷിക്കുന്നതിനിടെ രാത്രി 10 മണിയോടെ തൂങ്ങി മരിച്ച നിലയിൽ കണ്ടെത്തുകയായിരുന്നു. മക്കൾ: കല, പരേതനായ രതീഷ്. മരുമകൻ: രഘു. സുജാതയെ ഇടിച്ച ബൈക്കിൽ സഞ്ചരിച്ചിരുന്ന ദിലുവിന്റെ തലയ്ക്ക് സാരമായ പരിക്കുണ്ട്.