ന്യൂയോര്‍ക്ക്: മൂന്നു പതിറ്റാണ്ടിനിടെ അമേരിക്ക ഏറ്റവും ശക്തമായ ചുഴലിക്കാറ്റ് ഭീഷണിയില്‍. അറ്റ്‌ലാന്റിക് തീരപ്രദേശത്തെ മൂന്നു സംസ്ഥാനങ്ങളില്‍ നിന്ന് 15ലക്ഷം പേര്‍ക്ക് ഒഴിഞ്ഞുപോകാന്‍ നിര്‍ദേശം നല്‍കി. ഫ്‌ളോറന്‍സ് എന്നു പേരിട്ടിട്ടുളള കാറ്റഗറി നാല് ചുഴലിക്കാറ്റ് വ്യാഴാഴ്ച കരയില്‍ എത്തുമെന്നാണ് മുന്നറിയിപ്പ്.

മണിക്കൂറില്‍ 220 കിലോമീറ്റര്‍ വേഗത്തിലുളള ചുഴലിക്കാറ്റ് കരയിലെത്തുമ്പോഴേക്കും കൂടുതല്‍ വേഗം കൈവരിച്ചേക്കുമെന്നാണ് റിപ്പോര്‍ട്ട്. യുഎസ് സംസ്ഥാനമായ സൗത്ത് കാരലൈന അതിര്‍ത്തിയിലാകും ചുഴലിക്കാറ്റ് ആദ്യം കരതൊടുക. സൗത്ത് കാരലൈനയില്‍ 10 ലക്ഷം പേര്‍ക്കും നോര്‍ത്ത് കാരലൈനയില്‍ 2.5 ലക്ഷം പേര്‍ക്കും വെര്‍ജീനിയയില്‍ 2.45 ലക്ഷം പേര്‍ക്കുമാണ് ഒഴിഞ്ഞുപോകാനുളള മുന്നറിയിപ്പ് നല്‍കിയിരിക്കുന്നത്. 

കൊടുങ്കാറ്റിന് പുറമേ കനത്തമഴ, കടല്‍ക്ഷോഭം, പ്രളയം എന്നിവയ്ക്ക് സാധ്യതയുണ്ടെന്നാണ് മുന്നറിയിപ്പ്. മധ്യ അറ്റ്‌ലാന്റിക് മേഖലയിലാകെ പ്രളയമുണ്ടാകുമെന്ന രീതിയില്‍ കനത്തമഴയുണ്ടായേക്കും.