ദുബായ്:  സ്കൂൾ മുറ്റത്ത് വച്ച് കാറിടിച്ച് ഇന്ത്യക്കാരിയായ നാലു വയസുകാരിക്ക് ദാരുണാന്ത്യം. സ്‌കൂളിനു പുറത്ത് പാര്‍ക്ക് ചെയ്തിരുന്ന കാര്‍ പിറകോട്ട് എടുക്കുന്നതിനിടെയാണ് അപകടമുണ്ടായത്. നിയന്ത്രണം വിട്ട കാർ പിന്നിലുണ്ടായിരുന്ന കാറുകളിലേക്ക് ഇടിച്ചുകയറുകയായിരുന്നു.

അമ്മയും കുട്ടിയും പാർക്കിങ്ങിലുണ്ടായിരുന്ന കാറുകൾക്കിടയിൽ പെട്ടു. കുട്ടി സംഭവ സ്ഥലത്ത് വെച്ച് തന്നെ മരിച്ചു. ​ഗുരുതരമായ പരിക്കുകളോടെ അമ്മയെ ആശുപത്രിയിൽ പ്രവേശിപ്പിച്ചിരിക്കുകയാണ്.

ദുബായിൽ നിന്ന് 35 കിലോമീറ്റർ അകലെയുള്ള ജെബല്‍ അലി ടൗണിലാണ് അപകടം നടന്നതെന്നാണ് റിപ്പോർട്ടുകൾ. ബ്രേക്കിനു പകരം ഡ്രൈവർ അക്സിലേറ്റർ ചവിട്ടിയതാണ് അപകടകാരണമെന്ന് പൊലീസ് നി​ഗമനം. ആഫ്രിക്കൻ സ്വദേശിയായ സ്ത്രീയാണ് അപകടമുണ്ടാക്കിയ കാർ ഓടിച്ചതെന്ന് പൊലീസ് പറഞ്ഞു. മരിച്ച കുട്ടിയും കുടുംബവും ഇന്ത്യയിൽ എവിടെയാണെന്നത് സംബന്ധിച്ചുള്ള വിവരങ്ങൾ ഇനിയും പുറത്തുവന്നിട്ടില്ല.