കോവിഡ് വ്യാപനം കടുത്തതോടെ ഒരു നഗരത്തിലെ എല്ലാ മനുഷ്യരെയും ടെസ്റ്റ് ചെയ്യാന്‍ തീരുമാനിച്ച് വിയറ്റ്‌നാം. രാജ്യത്തെ പ്രധാന ടൂറിസ്റ്റ് കേന്ദ്രങ്ങളില്‍ ഒന്നായ തീരദേശ നഗരം ദനാംഗിലാണ് എല്ലാവര്‍ക്കും ടെസ്റ്റ് നടത്താന്‍ പോകുന്നത്. 11 ലക്ഷം ജനങ്ങളാണ് ഇവിടെയുള്ളത്. നഗരത്തില്‍ നാല്‍പ്പത് കേസുകളാണ് റിപ്പോര്‍ട്ട് ചെയ്തിരിക്കുന്നത്. 586പേര്‍ക്കാണ് വിയറ്റ്‌നാമില്‍ ആകെ രോഗം സ്ഥിരീകരിച്ചത്. ഇതില്‍ മൂന്നുപേര്‍ മരിച്ചു. 

ദനാംഗ് നഗരത്തിലെ ആശുപത്രികള്‍ കേന്ദ്രീകരിച്ചാണ് പുതിയ കേസുകള്‍ റിപ്പോര്‍ട്ട് ചെയ്തിരിക്കുന്നത്. ജൂലൈ 1ന് ശേഷം ദനാംഗില്‍ നിന്ന് 80,000പേര്‍ രാജ്യത്തിന്റെ മറ്റു ഭാഗങ്ങളിലേക്ക് സഞ്ചരിച്ചിട്ടുണ്ടെന്നാണ് ആരോഗ്യവകുപ്പിന്റെ കണ്ടെത്തല്‍. 

ജൂലൈ 25വരെ 8,247പേര്‍ക്ക് കോവിഡ് ടെസ്റ്റ് നടത്തിക്കഴിഞ്ഞു. 8,000മുതല്‍ 10,000വരെ ടെസ്റ്റുകള്‍ ഒരുദിവസം നടത്താനാണ് സര്‍ക്കാര്‍ ആലോചിക്കുന്നത്. ഹോചിമിന്‍ സിറ്റിയിലും ഹനോയി നഗരത്തിലും പുതിയ കോവിഡ് കേസുകള്‍ റിപ്പോര്‍ട്ട് ചെയ്തിട്ടുണ്ട്.