കുവൈത്ത് സിറ്റി: മാതാവ് ദുര്‍മന്ത്രവാദം നടത്തുന്നതായി സ്വപ്നം കണ്ടതിന് പിന്നാലെ അപ്പാര്‍ട്ട്‌മെന്റ് തകര്‍ത്ത് അകത്തുകയറി മാതാവിനെ കൊലപ്പെടുത്താന്‍ ശ്രമിച്ച യുവാവ് അറസ്റ്റില്‍. ഹവാലി ഗവര്‍ണേറ്റിലെ അല്‍ സല്‍മിയ ഏരിയയിലാണ് സംഭവം. പ്രതിയായ കുവൈത്തി യുവാവിനെ സുരക്ഷാ ഉദ്യോഗസ്ഥര്‍ അറസ്റ്റ് ചെയ്തു.
മാതാവ് ദുര്‍മന്ത്രവാദം നടത്തുന്നതായി സ്വപ്നം കണ്ടതിനെ തുടര്‍ന്നാണ് അവരെ കത്തി ഉപയോഗിച്ച് കൊല്ലാന്‍ ശ്രമിച്ചത് എന്നാണ് യുവാവ് പറയുന്നത്. മന്ത്രവാദം ചെയ്യുന്നതില്‍ നിന്നും മാതാവിനെ തടയാനാണ് കൊല്ലാന്‍ ശ്രമിച്ചതെന്നും ഇയാള്‍ പറഞ്ഞതായി സുരക്ഷാ ഉദ്യോഗസ്ഥര്‍ വ്യക്തമാക്കി.
ഒരു യുവാവ് മാതാവിനെ കൊലപ്പെടുത്താന്‍ ശ്രമിക്കുന്നുവെന്ന വിവരത്തെ തുടര്‍ന്നാണ് സുരക്ഷാ ഉദ്യോഗസ്ഥര്‍ സ്ഥലത്ത് എത്തിയത്. കയ്യില്‍ കത്തിയുമായി നില്‍ക്കുന്ന യുവാവിനെയാണ് അവിടെ കണ്ടത്. ഇയാളുമായി സംസാരിച്ച ഉദ്യോഗസ്ഥര്‍ യുവാവിനെ കാര്യങ്ങള്‍ പറഞ്ഞു മനസിലാക്കുകയും കത്തി മാറ്റുകയും ചെയ്തു. തുടര്‍ന്ന് അറസ്റ്റ് ചെയ്ത് അന്വേഷണം നടത്തിയപ്പോഴാണ് സംഭവവുമായി ബന്ധപ്പെട്ട വിവരങ്ങള്‍ പുറത്തറിഞ്ഞത്. മുന്‍പൊലീസ് ഉദ്യോഗസ്ഥനാണ് പ്രതിയെന്നാണ് റിപ്പോര്‍ട്ടുകള്‍. ഫെബ്രുവരി മാസത്തില്‍ ഇയാളെ ജോലിയില്‍ നിന്നും പിരിച്ചുവിട്ടിരുന്നു. എന്നാല്‍, മകനെതിരെ കേസുകൊടുക്കാന്‍ മാതാവ് തയാറായില്ല. തന്റെ മകന്‍ മാനസിക വെല്ലുവിളികള്‍ നേരിടുന്നുണ്ടെന്നും ആശുപത്രിയില്‍ ചികില്‍സയിലാണെന്നുമാണ് മാതാവിന്റെ പ്രതികരണം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ