കാല്‍ നിലത്ത് മുട്ടിക്കാതെ സൈക്കിള്‍ ഒരു പടി കയറ്റുന്ന കാര്യത്തെ കുറിച്ച് ആലോചിക്കാന്‍ പോലും കഴിയില്ല. അപ്പോള്‍ 33 നിലകള്‍ ഒരുതവണ പോലും കാല്‍ നിലത്ത് മുട്ടിക്കാതെ സൈക്കിള്‍ ചവിട്ടി കയറ്റിയത് ഒന്നു ഓര്‍ത്തു നോക്കൂ!. അമ്പരന്നില്ലെങ്കിലേ അത്ഭുതമുള്ളു. ഇതോക്കെ നടക്കുമോ എന്ന് ചോദിക്കുന്നവരാകും അധികവും.

ഫ്രഞ്ച് സൈക്കിള്‍ താരമാണ് ഏവരെയും വിസ്മയിപ്പിച്ച് റെക്കോര്‍ഡിട്ടത്. 30 മിനിറ്റിനുള്ളില്‍ 768 പടികളാണ് ചവിട്ടി കയറ്റിയത്. 33 നിലകള്‍ ഒരു തവണ പോലും കാല്‍ നിലത്ത് മുട്ടിക്കാതെയാണ് സൈക്കിള്‍ ചവിട്ടി കയറ്റിയത്. ഔറേലിയന്‍ ഫോണ്ടെനോയ് സൈക്കിള്‍ ചവിട്ടി കയറ്റുന്നതിന്റെ വീഡിയോയാണ് വ്യാപകമായി പ്രചരിക്കുന്നത്. ഫ്രാന്‍സിലെ പുട്ടോക്സിലെ അംബരചുംബിയായ കെട്ടിടത്തിലായിരുന്നു യുവാവിന്റെ അഭ്യാസപ്രകടനം.

ഉദ്യമത്തിന്റെ അവസാന സമയത്ത് ചില പ്രതിസന്ധികള്‍ നേരിട്ടെങ്കിലും അതിനെ അതിജീവിച്ചാണ് ഔറേലിയന്‍ ഫോണ്ടെനോയ് മുന്നേറിയത്. മെറ്റല്‍ ഗോവണിപ്പടിയില്‍ തെന്നല്‍ ഉണ്ടായതായും കുത്തനെയുള്ള കയറ്റം ദുഷ്‌കരമായിരുന്നുവെന്നും യുവാവ് പറയുന്നു. ഹര്‍ഷാരവത്തോടെയാണ് യുവാവിന്റെ അഭ്യാസ പ്രകടനത്തെ കാഴ്ചക്കാര്‍ വരവേറ്റത്.

കടപ്പാട്: റോയിട്ടേഴ്‌സ്