തമിഴിലെ ആക്ഷൻ താരമാണ് വിശാൽ. ഇപ്പോൾ സോഷ്യൽ മീഡിയയിൽ വൈറലാവുന്നത് താരത്തിന്റെ ഒരു ഞെട്ടിപ്പിക്കുന്ന വിഡിയോ ആണ്. പുതിയ ചിത്രം മാർക്ക് ആന്റണിയുടെ സെറ്റിൽ വെച്ചുണ്ടായ അപകടത്തിൽ നിന്ന് തലനാരിഴയ്ക്കാണ് താരം രക്ഷപ്പെട്ടത്. നിയന്ത്രണം വിട്ട ലോറി നിലത്തു വീണു കിടക്കുന്ന വിശാലിന്റെ അടുത്തേക്ക് പാഞ്ഞ് അടുക്കുകയായിരുന്നു. മരണത്തെ മുഖാമുഖം കണ്ട അനുഭവത്തെക്കുറിച്ച് താരം തന്നെയാണ് സോഷ്യൽ മീഡിയയിൽ പങ്കുവച്ചത്.
പ്രോപ്പര്‍ട്ടി വച്ചുളള വാഹനം ഉപയോഗിച്ചുള്ള ഷൂട്ടിങ്ങാണ് ചിത്രീകരിച്ചുകൊണ്ടിരുന്നത്. ആക്ഷന്‍ രംഗമായിരുന്നു ഇത്. താരത്തെ ഒരാള്‍ നിലത്തേക്ക് തള്ളിയിടുന്നതും വിഡിയോയില്‍ കാണാം. അതിനിടെ നിയന്ത്രണം വിട്ട വാഹനം പാഞ്ഞ് എത്തുകയായിരുന്നു. എന്നാല്‍ താരത്തിന്റെ അടുത്തു നിന്ന് വെട്ടിച്ചുമാറ്റിയ വണ്ടി മതിലില്‍ ഇടിച്ചു നില്‍ക്കുകയായിരുന്നു. മരണത്തില്‍ നിന്ന് രക്ഷപ്പെട്ടതിന് ദൈവത്തിനു നന്ദി പറഞ്ഞുകൊണ്ടാണ് താരം വിഡിയോ പങ്കുവച്ചത്.
കുറച്ച് സെക്കന്‍ഡുകളുടേയും കുറച്ച് ഇഞ്ചുകളുടേയും വ്യത്യാസത്തില്‍ എന്റെ ജീവന്‍ രക്ഷപ്പെട്ടു. ദൈവത്തിന് നന്ദി. അപ്രതീക്ഷിത സംഭവത്തില്‍ ഞെട്ടിത്തരിച്ചെങ്കിലും ധൈര്യം തിരിച്ചുപിടിച്ച് ഷൂട്ടിങ് ആരംഭിച്ചു.- വിശാല്‍ കുറിച്ചു. സോഷ്യല്‍ മീഡിയയില്‍ വൈറലാവുകയാണ് വിഡിയോ. നിരവധി ആരാധകരും താരങ്ങളുമാണ് അമ്പരപ്പ് രേഖപ്പെടുത്തുന്നത്.
വിഡിയോ റീട്വീറ്റ് ചെയ്തുകൊണ്ട് എസ്‌ജെ സൂര്യയും എത്തി. നൂലിഴ വ്യത്യാസത്തിലാണ് രക്ഷപ്പെട്ടതെന്നും ലോറി കുറച്ചു നീങ്ങിയാണ് വന്നിരുന്നതെങ്കില്‍ ഇത് ട്വീറ്റ് ചെയ്യാന്‍ നമ്മളാരും ഉണ്ടാകില്ലായിരുന്നെന്നും താരം കുറിച്ചു. എസ്‌ജെ സൂര്യയും സംഭവസമയത്ത് സെറ്റിലുണ്ടായിരുന്നു. സാങ്കേതിക പ്രശ്‌നങ്ങള്‍കൊണ്ടാണ് അപകടമുണ്ടായതെന്നും ആര്‍ക്കും പരുക്കില്ലെന്നും ചിത്രത്തിന്റെ നിര്‍മാതാക്കള്‍ കുറിച്ചു.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
