ഗാന്ധിനഗർ: ലോക്ക്ഡൗൺ നിർദ്ദേശങ്ങൾ ലംഘിച്ച് പിറന്നാൾ ആഘോഷിച്ചതിന് ബിജെപി പ്രാദേശിക നേതാവടക്കം എട്ട് പേർ അറസ്റ്റിൽ. ഗുജറാത്തിലെ വഡോദരയിലുള്ള തുൾസിവാദ് മേഖലയിലാണ് സംഭവം. ബിജെപി നേതാവായ അനിൽ പർമറിന്റെ വീട്ടിൽ നടന്ന പിറന്നാളാഘോഷമാണ് അറസ്റ്റിലേക്ക് നയിച്ചത്.
ചൊവ്വാഴ്ച്ച രാത്രിയായിരുന്നു സംഭവം. പിറന്നാൾ ആഘോഷത്തിന്റെ ചിത്രങ്ങൾ സാമൂഹിക മാധ്യമങ്ങളിൽ പങ്കുവച്ചതോടെയാണ് പ്രശ്നങ്ങൾക്ക് തുടക്കം. ലോക്ക്ഡൗൺ ലംഘനം നടന്നതായി തെളിഞ്ഞതോടെ ചിത്രങ്ങളിലും വീഡിയോകളിലുമുണ്ടായിരുന്ന എട്ട് പേരെ പൊലീസ് അറസ്റ്റ് ചെയ്യുകയായിരുന്നു.
ഇവരെ കോവിഡ് പരിശോധനക്ക് വിധേയരാക്കുമെന്ന് കരേലിബാഗ് എസ്ഐ അറിയിച്ചു. പ്രതികൾക്കെതിരെ പകർച്ച വ്യാധി നിയമപ്രകാരം കേസെടുത്തതായും എസ്ഐ വ്യക്തമാക്കി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
