മാഡ്രിഡ്: ഹൃദയ സംബന്ധമായ പ്രശ്നങ്ങളെ തുടര്ന്ന് ബാഴ്സ താരം സെര്ജിയോ അഗ്യുറോ വിരമിക്കല് പ്രഖ്യാപനത്തിന് ഒരുങ്ങുന്നതായി റിപ്പോര്ട്ട്. അടുത്ത ആഴ്ച വിരമിക്കല് പ്രഖ്യാപനം നടത്തും എന്നാണ് റിപ്പോര്ട്ടുകള്.
എന്നാല് ആരോഗ്യസ്ഥിതി വിലയിരുത്താന് മൂന്ന് മാസത്തെ സമയമാണ് നിര്ദേശിച്ചിരിക്കുന്നത് എന്ന് പറഞ്ഞ് ബാഴ്സ വൈസ് പ്രസിഡന്റ് റാഫ യുസെതേ പ്രതികരിച്ചു. അഗ്യുറോ വിരമിക്കല് പ്രഖ്യാപനത്തിന് ഒരുങ്ങുന്നതായുള്ള റിപ്പോര്ട്ടുകളും അദ്ദേഹം തള്ളി. മൂന്ന് മാസം ആരോഗ്യനില വിലയിരുത്തിയതിന് ശേഷമാവും തുടര്ന്നും ഫുട്ബോള് കളിക്കാനാവുമോ ഇല്ലയോ എന്ന് ഡോക്ടര്മാര് വ്യക്തമാക്കുക.
മൂന്ന് മാസത്തോളം അഗ്യുറോയ്ക്ക് കളിക്കാന് സാധിക്കില്ല
ലാ ലീഗയില് അലാവസുമായുള്ള മത്സരത്തിന് ഇടയിലാണ് നെഞ്ചുവേദനയെ തുടര്ന്ന് അഗ്യുറോ ഗ്രൗണ്ട് വിട്ടത്. ഒക്ടോബറിലായിരുന്നു സംഭവം. ഉടനെ തന്നെ താരത്തെ ആശുപത്രിയില് പ്രവേശിപ്പിച്ചു. പരിശോധനയില് ഹൃദയ സംബന്ധമായ പ്രശ്നങ്ങള് കണ്ടെത്തി.
മൂന്ന് മാസത്തോളം അഗ്യുറോയ്ക്ക് കളിക്കാന് സാധിക്കില്ലെന്ന് ബാഴ്സ നേരത്തെ വ്യക്തമാക്കിയിരുന്നു. കഴിഞ്ഞ ട്രാന്സ്ഫര് വിന്ഡോയിലൂടെയാണ് മാഞ്ചസ്റ്റര് സിറ്റിയില് നിന്ന് ബാഴ്സയിലേക്ക് അഗ്യുറോ എത്തിയത്. എന്നാല് ബാഴ്സയ്ക്ക് വേണ്ടി 5 മത്സരങ്ങള് മാത്രമാണ് അഗ്യുറോയ്ക്ക് ഇതുവരെ കളിക്കാനായത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ