കൊച്ചി: ഡോളര് കടത്തുകേസുമായി ബന്ധപ്പെട്ട് സ്പീക്കര് പി ശ്രീരാമകൃഷ്ണന്റെ അഡീഷണല് പ്രൈവറ്റ് സെക്രട്ടറി കെ അയ്യപ്പനെ കസ്റ്റംസ് ചോദ്യം ചെയ്യും. ഇന്നു രാവിലെ 11 മണിക്ക് കൊച്ചിയിലെ കസ്റ്റംസ് ഓഫീസില് ഹാജരാകാന് അയ്യപ്പന് നിര്ദ്ദേശം നല്കി
സ്വര്ണക്കടത്ത് കേസിലെ പ്രതികളായ സ്വപ്നയും സരിത്തുമാണ് ഡോളര് അടങ്ങിയ ബാഗ് കോണ്സുലേറ്റ് ഓഫീസില് എത്തിക്കാന് സ്പീക്കര് ആവശ്യപ്പെട്ടുവെന്ന് കസ്റ്റംസിന് മൊഴി നല്കിയിരുന്നു. ഇതിന് പിന്നാലെയാണ് അഡീഷണല് പ്രൈവറ്റ് സെക്രട്ടറിയോട് ഹാജരാകാന്് കസ്റ്റംസ് നിര്ദ്ദേശിച്ചത്.
ഇരുവരും മജിസ്ട്രേറ്റിനും കസ്റ്റംസിനും നല്കിയ മൊഴിയില് സ്പീക്കര്ക്കെതിരെ ഗുരുതര ആരോപണങ്ങളാണ് ഉള്ളത്. അടുത്ത ആഴ്ച നോട്ടീസ് നല്കി സ്പീക്കറെ കൊച്ചിയിലേക്ക് വിളിച്ചുവരുത്താനാണ് കസ്റ്റംസ് നീക്കം
സ്വപ്നയും സരിത്തും കസ്റ്റംസിന് നല്കിയ മൊഴിയില് സ്പീക്കര് ഉള്പ്പെടെ പല പ്രമുഖരുടെയും പേരുണ്ടായിരുന്നു. മജിസ്ട്രേറ്റിന് മുന്നില് ഇതേ മൊഴി ആവര്ത്തിച്ചതോടെയാണ് നോട്ടീസ് നല്കി വിളിച്ചുവരുത്താന് കസ്റ്റംസ് തീരുമാനിച്ചതെന്നാണ് സൂചന.
സരിത്തിനെയും സ്വപ്നയെയും പുറത്തെ ഒരു ഫ്ലാറ്റിലേക്ക് സ്പീക്കര് വിളിച്ചുവരുത്തി ഡോളര് അടങ്ങിയ ബാഗ് കൈമാറുന്നു. അവരോട് കോണ്സുലേറ്റ് ജനറല് ഓഫീസിലേക്ക് എത്തിക്കാന് സ്പീക്കര് നിര്ദ്ദേശിച്ചു. ഇതുപ്രകാരം ഇരുവരും ബാഗ് കോണ്സുലേറ്റ് ജനറല് ഓഫീസില് എത്തിച്ചു എന്നാണ് സരിത്തിന്റെയും സ്വപ്നയുടെയും മൊഴി. കോണ്സുലേറ്റിലെ രണ്ട് ഡ്രൈവര്മാരെ കസ്റ്റംസ് ഇന്നലെ ചോദ്യം ചെയ്തിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ