അല്‍ഫോണ്‍സ് പുത്രന്‍ നിര്‍മിക്കുന്ന തൊബാമ നാളെ തീയെറ്ററുകളിലെത്തുകയാണ്. മമ്മൂട്ടി നായകനായെത്തുന്ന അങ്കിള്‍ ഉള്‍പ്പടെ നാല് ചിത്രങ്ങള്‍ക്കൊപ്പമാണ് തൊബാമ എത്തുന്നത്. കൂടാതെ ഹോളിവുഡ് ആക്ഷന്‍ ചിത്രം അവഞ്ചേഴ്‌സും നാളെ റിലീസ് ചെയ്യുന്നുണ്ട്.
ഇപ്പോള്‍ അല്‍ഫോണ്‍സിന്റെ ഒരു ഫേയ്‌സ്ബുക് പോസ്റ്റാണ് സോഷ്യല്‍ മീഡിയയില്‍ വൈറലായിക്കൊണ്ടിരിക്കുന്നത്. അവഞ്ചേഴ്‌സിലെ ഒരു നടന് ലഭിക്കുന്ന പ്രതിഫലത്തിന്റെ ഏഴില്‍ ഒന്ന് മാത്രമാണ് തങ്ങളുടെ ചിത്രത്തിന്റെ ബജറ്റെന്നാണ് പോസ്റ്റിലൂടെ അല്‍ഫോണ്‍സ് പുത്രന്‍ പറയുന്നത്. എന്നാല്‍ ചിത്രത്തില്‍ ചങ്കുറപ്പുള്ള നടന്മാരുണ്ടെന്നും അദ്ദേഹം കുറിച്ചു.
'നാളെ അവഞ്ചേര്‍സ് എന്ന സിനിമയും ഇറങ്ങുന്നുണ്ട് . അതില്‍ അഭിനയിക്കുന്ന റോബര്‍ട്ട് ഡൗണി ജൂനിയര്‍ വാങ്ങുന്ന പ്രതിഫലത്തിന്റെ ഏഴില്‍ ഒന്ന് മാത്രമാണ് ഞങ്ങളുടെ സിനിമയുടെ മുഴുവന്‍ ബജറ്റ്. തൊബാമയില്‍ സൂപ്പര്‍ ഹീറോസ് ഇല്ല.. പക്ഷെ സാധാരണ ഹീറോസ് ഉണ്ട്... നല്ല ചങ്കോറപ്പൊള്ള നടന്മാരുണ്ട്. കഥാപാത്രങ്ങള്‍ക്കു വേണ്ടി നല്ലോണം പണിയെടുത്ത ഒരുപാട് ആള്‍ക്കാര് ഈ സിനിമയില്‍ ഉണ്ട്. പിന്നെ പുതുമ. അത് പ്രതീക്ഷിക്കരുത്.' അല്‍ഫോണ്‍സ് പുത്രന്‍ ഫേയ്‌സ്ബുക് പോസ്റ്റില്‍ പറയുന്നു.
വിനീത് ശ്രീനിവാസന്‍ നായകനായെത്തുന്ന അരവിന്ദന്റെ അതിഥികളും നാളെ റിലീസ് ചെയ്യുന്നുണ്ട്. മുന്‍പ് ഉണ്ണി മുകുന്ദന്റെ ചാണക്യതന്ത്രവും സുരാജ് വെഞ്ഞാറമൂടിന്റെ അഭാസവും റിലീസ് ചെയ്യുമെന്ന് അറിയിച്ചിരുന്നു. അവസാനം ഇരു സിനിമകളും റിലീസ് തിയതി മാറ്റുകയായിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ