കൊച്ചി: ആട് 2ന് ശേഷം മിഥുൻ മാനുവൽ തോമസ് ഒരുക്കുന്ന ചിത്രമായ 'അർജന്‍റീന ഫാൻസ് കാട്ടൂർക്കടവിൽ കാളിദാസ് ജയറാം നായകനാകും. ആഷിഖ് ഉസ്മാനാണ് ചിത്രം നിർമിക്കുന്നത്. പുതുമുഖങ്ങളാണ് പ്രധാന കഥാപാത്രങ്ങളെ അവതരിപ്പിക്കുന്നതെന്നായിരുന്നു റിപ്പോർട്ടുകൾ. ചിത്രത്തിന്റെ മറ്റ് വിവരങ്ങളൊന്നും അന്ന് വെളിപ്പെടുത്തിയിരുന്നില്ല.

ഇപ്പോള്‍ ചിത്രത്തിലെ നായകനേയും നായികയേയും പ്രേക്ഷകര്‍ക്ക് പരിചയപ്പെടുത്തിയിരിക്കുകയാണ് മിഥുന്‍. കാളിദാസ് ജയറാമാണ് ചിത്രത്തിലെ നായകന്‍. ഞണ്ടുകളുടെ നാട്ടില്‍ ഒരിടവേള, മായാനദി എന്നീ ചിത്രങ്ങളിലൂടെ ശ്രദ്ധേയായ ഐശ്വര്യ ലക്ഷ്മിയാണ് ചിത്രത്തിലെ നായികയായി എത്തുന്നത്. ഇവര്‍ക്കൊപ്പം ഒരുപിടി പുതുമുഖങ്ങളും ചിത്രത്തില്‍ എത്തുന്നുണ്ട്. 

ആഷിഖ് ഉസ്മാനാണ് ചിത്രം നിര്‍മിക്കുന്നത്. അര്‍ജന്റീന ഫാന്‍സിന് മാത്രമല്ല എല്ലാ ഫാന്‍സിനും ഇഷ്ടപ്പെടുന്നതായിരിക്കും ചിത്രമെന്ന് മിഥുന്‍ പറയുന്നു. പൂമരത്തിന് ശേഷം കാളിദാസ് ജീത്തു ജോസഫ് ചിത്രത്തില്‍ നായകനാകുന്നതായി വാര്‍ത്തകളുണ്ടായിരുന്നു. മിഥുന്‍ പുതിയ ചിത്രത്തിന്റെ ചിത്രീകരണം എന്ന് ആരംഭിക്കുന്നമെന്നത് വ്യക്തമാക്കിയിട്ടില്ല.

കോട്ടയം കുഞ്ഞച്ചൻ, ആട് 3, കുഞ്ചാക്കോ ബോബൻ നായകനാകുന്ന അള്ള് രാമേന്ദ്രൻ എന്നീ ചിത്രങ്ങൾ മിഥുന്‍റെതായി പുറത്തിറങ്ങാനുണ്ട്.