മുംബൈ: ശിവസേന സ്ഥാപകന്‍ ബാല്‍ താക്കറെയുടെ ജീവിതത്തെ ആസ്പദമാക്കി അഭിജിത്ത് പന്‍സേ ഒരുക്കുന്ന ചിത്രത്തെ കുറിച്ച് നേരത്തെ തന്നെ വാർത്തകളുണ്ടായിരുന്നു. നവാസുദ്ദീൻ സിദ്ദിഖിയാണ് ചിത്രത്തിൽ താക്കറെയായി എത്തുന്നത്. ചിത്രത്തിനായി ആരാധകർ ആകാംക്ഷയോടെയാണ് കാത്തിരിക്കുന്നത്. അതിനിടെ സിനിമയിലെ ചില ദൃശ്യങ്ങള്‍ സാമൂഹിക മാധ്യമങ്ങളില്‍ തരംഗമായി മാറുകയാണിപ്പോൾ. 

താക്കറേയുടെ വേഷത്തില്‍ സുരക്ഷാ സേനക്കൊപ്പമുള്ള നവാസുദ്ദീന്‍ സിദ്ദിഖിയുടെ വീഡിയോയാണ് വലിയ ചര്‍ച്ചയായി മാറിയിരിക്കുന്നത്. സിനിമയുടെ സെറ്റില്‍ നിന്നാണ് ഈ ദൃശ്യങ്ങള്‍ ചോര്‍ന്നതെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. 

താക്കറേയുമായി സിദ്ദിഖിക്ക് അസാധാരണമായ രൂപ സാദൃശ്യമുണ്ടെന്ന് സിനിമയുടെ ഫസ്റ്റ്‌ലുക്ക് പുറത്ത് വന്നപ്പോൾ ആരാധകർ വിലയിരുത്തി. 2019ല്‍ താക്കറേയുടെ 93-ാം ജന്മ വാര്‍ഷികത്തോട് അനുബന്ധിച്ച് ചിത്രം പുറത്തിറങ്ങും. മുകേഷ് അംബാനിയുടെ ഉടമസ്ഥതയിലുള്ള വയാകോം 18 മോഷന്‍ പിക്‌ചേഴ്‌സാണ് ചിത്രം നിര്‍മിക്കുന്നത്. 

സഞ്ജയ് റാവത്ത്, ശ്രീകാന്ത്‌ ഭാസി എന്നിവരാണ് ചിത്രത്തിന്റെ തിരക്കഥ ഒരുക്കുന്നത്. അബ്ദുൽ ഖ്വയ്ദര്‍, ലക്ഷമണ്‍ സിംഗ് രജ്പുത്ത്, അനുഷ്‌ക യാദവ്, നിരഞ്ജന്‍ ജാവിര്‍ എന്നിവരാണ് ചിത്രത്തിലെ മറ്റു താരങ്ങള്‍.