പഞ്ച്കുള: തനുശ്രീ ദത്തയ്‌ക്കെതിരെ ആരോപണങ്ങള്‍ ഉന്നയിച്ച ലാഘവത്തില്‍ ഗുസ്തി പിടിക്കാന്‍ ഗോദയിലേക്കിറങ്ങിയ വിവാദ നായിക രാഖി സാവന്തിന് കാലിടറി. വാചകമടി പോലെ അത്ര നിസ്സാരമല്ല കായികാഭ്യാസമെന്ന തിരിച്ചറിവിലാണ് താരം ഇപ്പോള്‍. ഗുസ്തിമത്സരത്തിനിടെ പരിക്കേറ്റ രാഖിയിപ്പോള്‍ നടുവിനും വയറിനും പരിക്കേറ്റ് ചികിത്സയിലാണ്.
ഹരിയാനയിലെ പഞ്ച്കുളയില്‍ നടന്ന കോണ്ടിനെന്റല്‍ റസ്ലിങ് എന്റര്‍ടെയിന്‍മെന്റിലാണ് വെല്ലുവിളിയുമായി രാഖി ഇറങ്ങിയത്. ഒരു കൈ നോക്കുന്നോയെന്ന് ചോദിച്ചതേയുള്ളൂ. വനിതാ ഗുസ്തി താരം രാഖിയോട് സമ്മതം മൂളി. ആദ്യ ഇടിയില്‍ നടുവും തല്ലി ദാ കിടക്കുന്നു ബോളിവുഡിലെ 'ഡ്രാമാ ക്വീന്‍'. വയറും നടുവും വേദനിക്കുന്നുവെന്ന് പറഞ്ഞ് റിങില്‍ വീണ രാഖിയെ ഒടുവില്‍ എടുത്തുകൊണ്ടാണ് സംഘാടകരും വനിതാ പൊലീസും ആശുപത്രിയിലേക്ക് പോയത്.
മീ ടൂ ക്യാമ്പെയിനെ പരിഹസിച്ചും തനുശ്രീ ദത്തയ്‌ക്കെതിരെ 25 പൈസയുടെ മാനനഷ്ടക്കേസ് നല്‍കിയും രാഖി നേരത്തേ വാര്‍ത്തയില്‍ നിറഞ്ഞ് നിന്നിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ