സൂപ്പര്‍താര പദവിയിലെത്തിച്ച 'ക്വീനി'ന്റെ സംവിധായകന്‍ വികാസ് ബഹിക്കെതിരെ ലൈംഗീകാരോപണവുമായി കങ്കണ റണൗട്ട് രംഗത്ത്. ചിത്രത്തിന്റെ ഷൂട്ടിംഗിനിടെ അസ്വസ്ഥതയുണ്ടാക്കുന്ന തരത്തില്‍ കെട്ടിപ്പിടിക്കുകയും മുടിയുടെ ഗന്ധം ആസ്വദിക്കുകയും ചെയ്തിരുന്നുവെന്നും അവര്‍ ഇന്ത്യാ ടുഡേയ്ക്ക് നല്‍കിയ അഭിമുഖത്തില്‍ വെളിപ്പെടുത്തി. മുടിയുടെ മണം അയാള്‍ക്കിഷ്ടമാണെന്ന് പറയുകയും സാധാരണ രീതിയില്‍ എല്ലാവരെയും ആശ്ലേഷിക്കുന്നത് പോലെ കെട്ടിപ്പിടിക്കുമ്പോള്‍ കഴുത്തില്‍ മുഖം അമര്‍ത്തുകയും ചെയ്യുമായിരുന്നുവെന്നും അവര്‍ തുറന്ന് പറഞ്ഞു.
സെറ്റില്‍ നിന്നും നേരത്തേ ഉറങ്ങാന്‍ പോകുന്നതിനും സോഫ്റ്റായി പെരുമാറാത്തതിനും ബഹി ചൂടാകുമായിരുന്നുവെന്നും കങ്കണ പറഞ്ഞു. വിവാഹിതനായിരുന്നുവെങ്കിലും പരസ്ത്രീസമാഗമങ്ങളെ കുറിച്ച് വീമ്പ് പറയുമായിരുന്നുവെന്നും അവര്‍ കൂട്ടിച്ചേര്‍ത്തു.
വികാസ് ബഹിക്കെതിരെ ലൈംഗീകാരോപണവുമായി വന്ന നടിയെ താന്‍ പിന്തുണച്ചത് മൂലം തനിക്ക് സിനിമകള്‍ നഷ്ടമായിട്ടുണ്ടെന്നും പക്ഷേ താന്‍ ആ പെണ്‍കുട്ടിക്കൊപ്പം തന്നെ ഉറച്ച് നില്‍ക്കുമെന്നും അവര്‍ പറഞ്ഞു. ആ പരാതിയില്‍ സത്യമുണ്ടെന്ന് തന്നെയാണ് വിശ്വാസം. സ്ത്രീകളോടുള്ള അയാളുടെ പെരുമാറ്റം ഒട്ടും ശരിയല്ലെന്നും താരം തുറന്നടിച്ചു. ഝാന്‍സി റാണിയുടെ വീരകഥ പറയുന്ന മണികര്‍ണികയാണ് കങ്കണയുടെ പുറത്തിറങ്ങാനുള്ള ചിത്രം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ