അഭിനയം കൊണ്ടും അഭിപ്രായംകൊണ്ടും കയ്യടിവാങ്ങുന്ന നടിയാണ് രാധിക ആപ്തെ. നിരവധി ശക്തമായ കഥാപാത്രങ്ങൾ താരത്തിന്റെ പേരിലുണ്ട്. എന്നാൽ ഒരു സമയത്ത് സെക്സ് കോമഡികള് ചെയ്യാൻ മാത്രമെ സംവിധായകർ തന്നെ സമീപിച്ചിട്ടുള്ളുവെന്ന് തുറന്നു പറഞ്ഞിരിക്കുകയാണ് താരം. മാധ്യമപ്രവര്ത്തക ബര്ഖ ദത്ത് നടത്തിയ പ്രത്യേക പരിപാടിയായ വി ദ വിമണിലായിരുന്നു രാധികയുടെ തുറന്നുപറച്ചിൽ.
ശ്രീറാം രാഘവർ സംവിധാനം ചെയ്ത 'ബദ്ലാപൂർ' എന്ന ചിത്രത്തിന് ശേഷമാണ് സംവിധായകർ സെക്സ് കോമഡി പ്രോജക്ടുകളുമായി രാധികയെ സമീപിക്കാൻ തുടങ്ങിയത്. ചിത്രത്തിൽ നായകൻ തന്നെ ബലമായി വസ്ത്രങ്ങൾ അഴിക്കാൻ ശ്രമിക്കുന്ന രംഗമുണ്ടായിരുന്നു. ഇതാണ് അതിന് കാരണമായതെന്നും രാധിക പറഞ്ഞു. എന്നാൽ ബലാത്സംഗം ചെയ്യാനും കൊല്ലാനും തുനിഞ്ഞയാൾ വസ്ത്രം ഊരിമാറ്റുന്നതുകണ്ട് സെക്സ് കോമഡി പ്രൊജക്ടുമായി തന്നെ സമീപിച്ചതിൽ അതിശയമുണ്ടെന്നാണ് താരം പറയുന്നത്.
എന്നാൽ സ്ത്രീകളുടെ കാഴ്ചപ്പാടിനെ പറഞ്ഞുവയ്ക്കാത്ത കോമഡി ചിത്രങ്ങളിലോ സെക്സ് കോമഡികളിലോ താൻ അഭിനയിക്കില്ലെന്നും താരം വ്യക്തമാക്കി. കരിയറിനെ സാരമായി ബാധിക്കുമെന്നതിനാൽ നിരവധി പ്രോജക്ടുകൾ വേണ്ടെന്ന് വച്ചിട്ടുണ്ടെന്നും താരം കൂട്ടിച്ചേർത്തു. പുരോഗമനവാദത്തിന്റെ പേരിൽ ആളുകൾ എന്തും എഴുതുമെന്നാണ് എനിക്ക് തോന്നുന്നത്. ആണിനെ വെറുക്കുക എന്നത് പുരോഗമനവാദമല്ല. സിനിമ എന്നത് ഒരു കഥപറച്ചിൽ മാധ്യമമാണ്. പക്ഷേ ഒരു സംവിധായകൻ, എഴുത്തുകാരൻ എന്ന നിലയിൽ നിങ്ങൾ ചിലതൊക്കെ വിശദീകരിക്കുകയാണ്. നിങ്ങളുടെ വ്യാഖ്യാനവും കാഴ്ചപ്പാടുമൊക്കെ എനിക്ക് ഏറ്റവും പ്രധാനപ്പെട്ട കാര്യമാണ് രാധിക പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ