മലയാളത്തിലെ സൂപ്പര്‍ കപ്പിള്‍സാണ് കുഞ്ചാക്കോ ബോബനും പ്രിയയും. നീണ്ട കാത്തിരിപ്പിനൊടുവില്‍ ഇരുവരുടേയും ജീവിതത്തിലേക്ക് ഇസ എത്തിയത് കേരളം ഒന്നടങ്കമാണ് ആഘോഷിച്ചത്. ഇപ്പോള്‍ സോഷ്യല്‍ മീഡിയയില്‍ വൈറലാവുന്നത് ഇവരുടെ കുടുംബ ചിത്രമാണ്. വേദിയില്‍ നിന്ന് പ്രിയ സംസാരിക്കുമ്പോള്‍ ഉറങ്ങുന്ന കുഞ്ഞിനേയും പിടിച്ച് ചിരിയുമായി നില്‍ക്കുന്ന ചാക്കോച്ചനെയാണ് ചിത്രത്തില്‍ കാണുന്നത്. മനോഹര ചിത്രം സോഷ്യല്‍ മീഡിയയുടെ ഹൃദയം കീഴടക്കുകയാണ്.
പ്രിയയുടെ സ്‌കൂള്‍ റീയൂണിയനെത്തിയതായിരുന്നു ദമ്പതികള്‍. ചാക്കോച്ചന്‍ തന്നെയാണ് ചിത്രം സോഷ്യല്‍ മീഡിയയില്‍ പങ്കുവെച്ചത്. 'നിങ്ങളുടെ പ്രിയപ്പെട്ടവരുടെ കണ്ണുകളില്‍ തിളക്കം കാണുന്നതിനേക്കാള്‍ അമൂല്യമായി മറ്റൊന്നുമില്ല... 20 വര്‍ഷത്തിനുശേഷം ആദ്യമായി ടിവിഎം സെന്റ് തോമസ് സ്‌കൂളിലെ പ്രിയയുടെ ബാച്ചിന്റെ പുനഃസമാഗമ വേദിയിലാണ് ഞങ്ങള്‍. കൂടെ ഞങ്ങളുടെ ജീവിതത്തിലെ ഏറ്റവും വിലയേറിയ സമ്മാനവും. വീണ്ടും അവളെ സുന്ദരിയായ കൊച്ചുപെണ്‍കുട്ടിയെപ്പോലെ തോന്നിപ്പിക്കാന്‍ കഴിഞ്ഞതില്‍ സന്തോഷമുണ്ട്.' കുഞ്ചാക്കോ ബോബന്‍ കുറിച്ചു.
ഇരുവരുടേയും പ്രണയത്തെ വാഴ്ത്തി നിരവധി ആരാധകരാണ് രംഗത്തെത്തുന്നത്. ചാക്കോച്ചന്‍ മികച്ച അച്ഛനാണെന്നുപറയുന്നവരും നിരവധിയാണ്. ഏപ്രില്‍ 16 നാണ് കുഞ്ചാക്കോ ബോബനും പ്രിയയ്ക്കും ആണ്‍കുഞ്ഞ് പിറന്നത്. മലയാള സിനിമ ലോകവും ആരാധകരും ആവേശത്തോടെയാണ് കുഞ്ഞിനെ സ്വീകരിച്ചത്. സിനിമ തിരക്കുകള്‍ക്കിടയിലും ഇസയ്‌ക്കൊപ്പം സമയം ചെലവഴിക്കാന്‍ കുഞ്ചാക്കോ ബോബന്‍ ശ്രമിക്കാറുണ്ട്. ആരാധകരുമായി ഇസയുടെ വിശേഷവും താരം പങ്കുവെക്കാറുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ