തെന്നിന്ത്യന്‍ നടന്‍ ആര്യയുടെയും നടി സയേഷയുടെയും വിവാഹ ആഘോഷ ചിത്രങ്ങളാണ് സമൂഹമാധ്യമങ്ങളില്‍ നിറയുന്നത്. ഗംഭീര പ്രീ വെഡ്ഡിങ് ആഘോഷങ്ങള്‍ക്ക് പിന്നാലെ താരനിബിഡമായ വിവാഹാഘോഷങ്ങളാണ് ഹൈദ്രാബാദിലെ താജ് ഫലക്‌നുമ പാലസില്‍ നടക്കുന്നത്. ഫോറെവര്‍ ആര്‍ഡ് എവര്‍ എന്ന അടിക്കുറിപ്പോടെ ആഘോഷവേളയില്‍ സയേഷയ്‌ക്കൊപ്പം പകര്‍ത്തിയ ചിത്രങ്ങള്‍ ആര്യ തന്നെയാണ് പങ്കുവച്ചത്. 

മുസ്ലീം മതാചാര പ്രകരാമാണ് വിവാഹചടങ്ങുകള്‍. സിനിമ രംഗത്തുനിന്നുള്ള പല പ്രമുഖരും ചടങ്ങുകളില്‍ പങ്കെടുത്തു. അല്ലു അര്‍ജുന്‍, സഞ്ജയ് ദത്ത്, സെറീന വഹാബ്, സൂര്യ, ജ്യോതിക തുടങ്ങി ഒട്ടേറെ പ്രമുഖര്‍ വിവാഹത്തില്‍ പങ്കെടുക്കാനായി എത്തിച്ചേര്‍ന്നു. ഇന്നും നാളെയുമായാണ് വിവാഹാഘോഷങ്ങള്‍ നടക്കുന്നത്. വിവാഹശേഷം ഹൈദ്രാബാദില്‍ ഗംഭീര റിസപ്ഷനും നടക്കും. 

ഫെബ്രുവരി 14 പ്രണയ ദിനത്തിലാണ് സയേഷയുമായുള്ള വിവാഹകാര്യം സമൂഹമാധ്യമങ്ങളിലൂടെ ആര്യ സ്ഥിതീകരിച്ചത്. മാര്‍ച്ചില്‍ ഇരുവീട്ടുകാരുടെയും സാന്നിധ്യത്തിലാവും വിവാഹമെന്നും ആര്യ പറഞ്ഞിരുന്നു.

പ്രശസ്തനടന്‍ ദിലീപ് കുമാറിന്റെ അനന്തരവളാണ് സയേഷ. 'ഗജിനികാന്ത്' (2018) എന്ന ചിത്രത്തിലായിരുന്നു ആര്യയും സയേഷയും ആദ്യമായി ഒരുമിച്ച് അഭിനയിച്ചത്. സൂര്യയുടെ പുതിയ ചിത്രം 'കാപ്പാനി'ലും ഇരുവരും ഒന്നിച്ച് അഭിനയിക്കുന്നുണ്ട്. 2017ല്‍ അജയ് ദേവ്ഗണിന്റെ 'ശിവായ്' എന്ന ചിത്രത്തിലൂടെ ബോളിവുഡിലും സയേഷ അരങ്ങേറ്റം കുറിച്ചിരുന്നു.