ദുല്‍ഖര്‍ സല്‍മാനും സോനം കപൂറും പ്രധാനവേഷങ്ങളിലെത്തിയ ബോളിവുഡ് ചിത്രം സോയ ഫാക്ടര്‍ കഴിഞ്ഞ ദിവസമാണ് തിയേറ്ററുകളിലെത്തിയത്. ഇന്നലെ മുംബൈയില്‍ വെച്ച് നടന്ന ചിത്രത്തിന്റെ പ്രദര്‍ശനത്തില്‍ പങ്കെടുക്കാനെത്തിയ ദുല്‍ഖര്‍ സല്‍മാന്റെ ഭാര്യ അമാല്‍ സൂഫിയായിരുന്നു ചടങ്ങിന്റെ മുഖ്യ ആകര്‍ഷണം.
അമാലും ദുല്‍ഖറും ഒന്നിച്ചുള്ള ചിത്രങ്ങള്‍ സാമൂഹ്യമാധ്യമങ്ങളില്‍ തരംഗമാവുകയാണ്. പ്രത്യേക തരത്തില്‍ ഡിസൈന്‍ ചെയ്ത ഗോള്‍ഡന്‍ വസ്ത്രമായിരുന്നു അമാല്‍ ധരിച്ചിരുന്നത്. അമാലിന് പുറമെ സോനം കപൂറിന്റെ ഭര്‍ത്താവ് ആനന്ദ് ആഹുജയും ചിത്രം കാണാന്‍ എത്തിയിരുന്നു. ബോളിവുഡ് താരങ്ങളായ അര്‍ജുന്‍ കപൂര്‍, കത്രീന കൈഫ് തുടങ്ങിയവരും ചിത്രത്തിന്റെ പ്രദര്‍ശനം കാണാനെത്തിയിരുന്നു.
1983ല്‍ ഇന്ത്യ ലോകകപ്പ് നേടിയ ദിവസം ജനിച്ച സോയ സൊളാങ്കി എന്ന പെണ്‍കുട്ടിയെ ലോകകപ്പ് ജയിക്കാന്‍ ലക്കി ചാമായി തിരഞ്ഞെടുക്കുന്നതും തുടര്‍ന്നുണ്ടാകുന്ന രസകരങ്ങളായ സംഭവങ്ങളുമാണ് ചിത്രം പറയുന്നത്.
2008ല്‍ പ്രസിദ്ധീകരിച്ച അനുജ ചൗഹാന്റെ ദ സോയ ഫാക്ടര്‍ എന്ന പേരിലുള്ള നോവലിനെ ആസ്പദമാക്കിയാണ് ചിത്രം ഒരുക്കിയിരിക്കുന്നത്. പ്രദ്യുമ്‌നന്‍ സിങ് ആണ് തിരക്കഥ ഒരുക്കുന്നത്. സോയ സോളാങ്കിയുടെ വേഷത്തില്‍ സോനം കപൂറും ഇന്ത്യന്‍ ക്രിക്കറ്റ് ടീം ക്യാപറ്റന്‍ നിഖില്‍ ഘോടയായി ദുല്‍ഖറും വേഷമിടുന്നു. ഫോക്‌സ് സ്റ്റാര്‍ സ്റ്റുഡിയോസും ആഡ്‌ലാബ് ഫിലിംസും ചേര്‍ന്നാണ് ചിത്രം നിര്‍മിച്ചിരിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ