പോയവര്‍ഷം മികച്ച വിജയം നേടിയ ചിത്രങ്ങളില്‍ ഒന്നാണ് പാര്‍വതി തിരുവോത്ത് പ്രധാന വേഷത്തില്‍ എത്തിയ ഉയരെ. ആസിഡ് ആക്രമണത്തിന് ഇരയായ പല്ലവി എന്ന പെണ്‍കുട്ടിയുടെ അതിജീവനമാണ് ചിത്രത്തില്‍ പറയുന്നത്. ഉയരെ പ്രേക്ഷകർക്ക് മുന്നിലെത്തിയിട്ട് ഒരുവർഷം പൂർത്തിയാക്കിയതിന്റെ സന്തോഷം പങ്കുവച്ചിരിക്കുകയാണ് പാർവതി ഇപ്പോൾ.
മനു അശോകന്‍ എന്ന നവാഗത സംവിധായകനാണ് ഉയരെ ഒരുക്കിയത്. ആസിഫ് അലി, ടൊവിനോ തോമസ്, സിദ്ധിഖ്, അനാര്‍ക്കലി, അങ്ങനെ വലിയ താരനിരയാണ് ചിത്രത്തില്‍ അണിനിരന്നത്. എസ് ക്യൂബ് പ്രൊഡക്ഷന്‍സിന്റെ ബാനറില്‍ ഷെനുഗ, ഷെഗ്‌ന, ഷെര്‍ഗ എന്നിവര്‍ ചേര്‍ന്നാണ് ഉയരെയുടെ നിര്‍മ്മാണം. ബോബി-സഞ്ജയ് കൂട്ടുകെട്ടാണ് ചിത്രത്തിന്റെ തിരകഥ ഒരുക്കിയത്.
"നമ്മുടെയെല്ലാം ഉള്ളിലെ പല്ലവിയുടെ മനഃശക്തിയെ സല്യൂട്ട് ചെയ്യാം. ഉയരെയുടെ ഒരു വര്‍ഷം! ഉയരങ്ങളില്‍ നിന്ന് ഉയരങ്ങളിലേക്ക് പറക്കുന്നു. എല്ലാവരുടെയും സ്‌നേഹത്തിന് നന്ദി", ചിത്രങ്ങൾ പങ്കുവച്ചുകൊണ്ട് പാർവതി സന്തോഷം പങ്കുവച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ