രതീന ഷർഷാദ് ആദ്യമായി സംവിധാനം ചെയ്യുന്ന ചിത്രത്തിൽ മെഗാസ്റ്റാർ മമ്മൂട്ടി നായകനാകുന്നു. രതീന തന്നെയാണ് പുതിയ വിശേഷങ്ങൾ പുറത്തുവിട്ടത്. ഹർഷാദ്, ഷറഫു, സുഹാസ് എന്നിവർ ചേർന്നാണ് ചിത്രത്തിന് തിരക്കഥയൊരുക്കുന്നത്. ജോർജ് സെബാസ്റ്റ്യൻ, ശ്യാം മോഹൻ, അർജുൻ രവീന്ദ്രൻ എന്നിവർ ചേർന്നാണ് ചിത്രം നിർമ്മിക്കുന്നത്.
ഇതാദ്യമായാണ് ഒരു വനിതാ സംവിധായികക്കൊപ്പം മമ്മൂട്ടി പ്രവർത്തിക്കുന്നത് എന്ന പ്രത്യേകതയും ഈ ചിത്രത്തിനുണ്ട്. "ജീവിതത്തിലെ ഒരു പുതിയ ഘട്ടത്തിലേയ്ക്ക് പ്രവേശിക്കാൻ ഞാൻ തയ്യാറാണ്. ഒരു സംവിധായകയെന്ന നിലയിൽ എന്റെ ആദ്യ സിനിമയിൽ സൈൻ ചെയ്തതിന്റെ സന്തോഷത്തിലാണ് ഞാൻ", രതീന ഫേസ്ബുക്ക് പേജിൽ കുറിച്ചു.
ഗിരീഷ് ഗംഗാധരൻ കാമറ ചലിപ്പിക്കും. ജേക്സ് ബിജോയ് ആണ് സംഗീതം. ദീപു ജോസഫ് എഡിറ്റിങ്ങും സമീറ സനീഷ് വസ്ത്രാലങ്കാരവും നിർവഹിക്കും. മനു ജഗത് ആണ് കലാ സംവിധാനം. പാർവതി കേന്ദ്രകഥാപാത്രത്തെ അവതരിപ്പിച്ച ഉയരെയുടെ എക്സിക്യൂട്ടീവ് പ്രൊഡ്യൂസറായിരുന്നു രതീന.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ