ന്യൂഡല്‍ഹി: ബോളിവുഡ് നടന്‍ സുശാന്ത് സിങ് രജ്പുത്തിന്റെ മരണത്തില്‍ സിബിഐ അന്വേഷണം വേണമെന്ന ഹര്‍ജി സുപ്രീംകോടതി തള്ളി. ചീഫ് ജസ്റ്റിസ് എസ് എ ബോബ്‌ഡെയുടെ നേതൃത്വത്തിലുള്ള ബെഞ്ചാണ് ഹര്‍ജി തള്ളിയത്. പൊലീസ് അവരുടെ ജോലി ചെയ്യട്ടെ എന്നും കോടതി അഭിപ്രായപ്പെട്ടു.
നിലവില്‍ മുംബൈ പൊലീസ് അന്വേഷിക്കുന്ന കേസില്‍, ബിഹാര്‍ പൊലീസും അന്വേഷണം ആരംഭിച്ചിട്ടുണ്ട്. മരണവുമായി ബന്ധപ്പെട്ട് ആരോപണവിധേയയായ നടി റിയ ചക്രബര്‍ത്തിക്ക് എതിരെ സുശാന്തിന്റെ പിതാവ് കെ കെ സിങ് നല്‍കിയ പരാതിയുടെ അടിസ്ഥാനത്തിലാണ് പട്‌ന പൊലീസ് അന്വേഷണം ആരംഭിച്ചിരിക്കുന്നത്.
മുംബൈ പൊലീസില്‍ നിന്ന് കേസ് എറ്റെടുക്കാനായി പട്‌നയില്‍ നിന്ന് നാല് പൊലീസ് ഉദ്യോഗസ്ഥര്‍ കഴിഞ്ഞ ദിവസം മുംബൈയില്‍ എത്തിയിരുന്നു. അതേസമയം, ആരോപണ വിധേയയായ റിയ, മുംബൈയിലെ താമസ സ്ഥലത്ത് നിന്ന് മാറിയെന്നാണ് വിവരം.ജൂണ്‍ 14നാണ് സുശാന്തിനെ വീട്ടിനുള്ളില്‍ തൂങ്ങിമരിച്ച നിലയില്‍ കണ്ടെത്തിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ