ആന ചരിഞ്ഞ സംഭവത്തിൽ വിദ്വേഷം പ്രചരിപ്പിക്കാൻ ശ്രമിച്ചവർക്കെതിരെ വിമർശനം രൂക്ഷമാവുകയാണ്. സിനിമ താരങ്ങൾ ഉൾപ്പടെ നിരവധി പേർ ഇതിനോടകം രംഗത്തെത്തിക്കഴിഞ്ഞു. മലപ്പുറം ജില്ലയെക്കുറിച്ച് വ്യാജ പ്രചാരണം നടത്തിയ മുൻ കേന്ദ്രമന്ത്രിയും ബിജെപി നേതാവുമായ മേനക ഗാന്ധിയാണ് വർഗീയ പ്രചരണങ്ങൾക്ക് തുടക്കമിട്ടത്. ഇപ്പോൾ മേനക ഗാന്ധിയെ വിമർശിച്ച് രംഗത്തെത്തുകയാണ് സിനിമ സംവിധായകൻ മിഥുൻ മാനുവൽ തോമസ്. കേരളത്തിൽ നിങ്ങൾ ഇപ്പോള് തന്നെ വലിയ കൊമേഡിയൻമാരായി മാറിക്കഴിഞ്ഞു എന്നാണ് ഫേയ്സ്ബുക്കിൽ മിഥുൻ കുറിക്കുന്നത്.
മിഥുൻ മാനുവൽ തോമസിന്റെ കുറിപ്പ്
ഡിയർ മനേക മാഡം. കേരളത്തിൽ നിങ്ങൾ ഇപ്പോള് തന്നെ വലിയ കൊമേഡിയൻമാരായി മാറിക്കഴിഞ്ഞു. അത് നിങ്ങൾക്ക് ഇതുവരെയും മനസിലായിട്ടില്ലെന്നതാണ് ഇതിൽ ഏറ്റവും രസകരം. അത് എന്തുകൊണ്ടാണെന്ന് പറഞ്ഞുതരാം. തലമുറകളായി വിദ്യാഭ്യാസവും സാക്ഷരതയും ഞങ്ങൾ വലിയ ഗൗരവത്തോടെ തന്നെയാണ് സ്വീകരിച്ചുപോകുന്നത്. എന്നാൽ നിങ്ങൾ ആ സമയം മറ്റുള്ളവരെ വഞ്ചിക്കാനും വർഗീയ വിദ്വേഷം പ്രചരിപ്പിക്കുവാനുമാണ് സമയം കണ്ടെത്തുന്നത്. നിങ്ങള് നിങ്ങളുടെ ജാതീയ വിഭജനം നടത്തൂ. ഞങ്ങളെ കൂടുതൽ രസിപ്പിക്കൂ. ഈ കൊറോണ പ്രതിസന്ധിക്കാലത്ത് ചിരിക്കാനായി അൽപം സമയം കണ്ടെത്തുന്നത് നിങ്ങളിലൂടെയാണ്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ