കൊറോണ വൈറസ് ഭീതിയും ഐസൊലേഷനും ക്വാറന്റൈനും എല്ലാമായി ഭീതിയിലാണ് ആളുകൾ. ഇതിനൊപ്പം തന്നെ സാമ്പത്തിക ഭദ്രത ഉറപ്പാക്കാനുള്ള പരക്കംപാച്ചിലിലുമാണ് ചിലർ. ദിവസ‌വേതനക്കാർക്കടക്കം കൊറോണക്കാലം വലിയ പ്രതിസന്ധിയാണ് സൃഷ്ടിച്ചിരിക്കുന്നത്. ഈ സാഹചര്യത്തിൽ തന്റെ ജോലിക്കാർക്കും സഹപ്രവർത്തകർക്കുമടക്കം സഹായഹസ്തവുമായി  എത്തിയിരിക്കുകയാണ് നടൻ പ്രകാശ് രാജ്. 

തന്റെ സമ്പാദ്യത്തിൽ നിന്ന് വീട്ടിലെയും നിർമാണ കമ്പനിയിലേയുമടക്കം ജോലിക്കാർക്ക് വരുന്ന മെയ് വരെയുള്ള മുൻകൂർ ശമ്പളം ഒന്നിച്ച് നൽകിയിരിക്കുകയാണ് അദ്ദേഹം. കൊറോണയെത്തുടർന്ന് നിർത്തിവച്ചിരിക്കുന്ന തന്റെ മൂന്ന് സിനിമകളിൽ ദിവസവേതനത്തിൽ ജോലി ചെയ്തിരുന്നവർക്ക് പകുതി ശമ്പളമെങ്കിലും ലഭ്യമാക്കാനുള്ള വഴി കണ്ടെത്തിയെ‌ന്നും അദ്ദേഹം അറിയിച്ചു. 

ഇതുകൊണ്ടൊന്നും തന്റെ ജോലി അവസാനിച്ചിട്ടില്ലെന്നും തുടർന്നും കഴ‌ിയുന്ന രീതിയിൽ ആവശ്യക്കാരെ സഹായിക്കുമെന്നും അദ്ദേഹം പറഞ്ഞു. ഇതിനൊപ്പം കഴിയുന്നവരെല്ലാം ചുറ്റുമുള്ള അവശ്യക്കാരെ സഹായിക്കണമെന്ന് അഭ്യർത്ഥിക്കുകയും ചെയ്തു.