ലോക്ക്ഡൗൺ വിശേഷങ്ങൾ പതിവായി ആരാധകരിലേക്കെത്തിക്കുന്ന താരമാണ് നടി സണ്ണി ലിയോണി. ഇപ്പോഴിതാ ഭർത്താവിനെ കുരുക്കിലാക്കിയ ഒരു പ്രാങ്ക് വിഡിയോയുമായാണ് താരം ആരാധകർക്ക് മുന്നിൽ എത്തിയിരിക്കുന്നത്. അതും ലൈവ് വിഡിയോയിലൂടെ. 

അടുക്കളയിൽ ജോലിചെയ്യുന്നതിനിടയിൽ കൈവിരൽ അറ്റുപോകുന്നതായാണ് സണ്ണി അഭിനയിച്ചത്. ഇതിനുവേണ്ട പദ്ധതികൾ താരം മുൻകൂട്ടി ഒരുക്കിയിരുന്നു. കൃത്രിമ വിരലടക്കം അടുക്കളയിൽ സജ്ജീകരിച്ച താരം രക്തമൊഴുക്കിയശേഷം അലറി വിളിക്കുകയായിരുന്നു. സണ്ണിയുടെ കരച്ചിൽ കേട്ട് അടുക്കളയിലേക്ക് ഓടിയെത്തിയ ഡാനിയേൽ രക്തം കണ്ടതും പരിഭ്രാന്തിയിലായി. ഉടൻ തന്നെ ആശുപത്രിയിൽ പോകാൻ സണ്ണിയെ നിർബന്ധിക്കുകയായിരുന്നു ഡാനിയേൽ. ഈ സമയം ഫോണിലെ ലൈവ് ചൂണ്ടിക്കാട്ടി പ്രാങ്ക് വെളിപ്പെടുത്തുകയായിരുന്നു സണ്ണി. 

താരത്തിന്റെ പ്രാങ്ക് ഐഡിയയെ പ്രശംസിച്ചും അഭിനയത്തെ പ്രകീർത്തിച്ചുമൊക്കെ നിരനധിപ്പേർ കമന്റ് ചെയ്തിട്ടുണ്ടെങ്കിലും ഒരുപാട് സ്നേഹിക്കുന്നവരെ ഇങ്ങനെ പറ്റിക്കരുത് എന്ന് പറയുന്നവരും ഇക്കൂട്ടത്തിലുണ്ട്. എന്തുതന്നെയായാലും സണ്ണിയുടെ വിഡിയോ സോഷ്യൽ മീഡിയയിൽ വൈറലായിക്കഴിഞ്ഞു.