തൃഷയും ചിമ്പുവിനേയും കേന്ദ്രകഥാപാത്രങ്ങളാക്കി ഗൗതം വാസുദേവ മേനോൻ ഒരുക്കിയ ഹിറ്റ് ചിത്രമാണ് ‘വിണ്ണൈതാണ്ടി വരുവായാ’. സിനിമയുടെ രണ്ടാം ഭാ​ഗത്തെക്കുറിച്ച് കാര്യമായ ചർച്ചകൾ നടക്കുന്നതിനിടയിൽ ഒരു പുതിയ ട്വിസ്റ്റുമായി എത്തുകയാണ് സംവിധായകൻ. ഗൗതം മേനോൻ സോഷ്യൽ മീഡിയയിൽ പങ്കുവച്ച ഒരു ടീസറാണ് ഇപ്പോൾ ചർച്ചയാകുന്നത്. 

ലോക്ഡൗണിൽ ജെസ്സി കാർത്തിക്കിനെ ഫോണിൽ വിളിക്കുന്നതാണ് ടീസറിന്റെ ഉള്ളടക്കം. എഴുത്ത് തുടരണമെന്നും എല്ലാം ശരിയാകുമെന്നും കാർത്തിക്കിനെ ആശ്വസിപ്പിക്കുകയാണ് ജെസ്സി. ലോക്ഡൗൺ മാറി വീണ്ടും തിയറ്ററുകൾ തുറക്കുമെന്നും  നെറ്റ്ഫ്‌ളിക്സും ആമസോണും നിന്നെ തേടി വരുമെന്നും പറഞ്ഞാണ് ജെസ്സി ആത്മവിശ്വാസം പകരുന്നത്. 

‘കാർത്തിക് ഡയൽ സെയ്ത യെൻ’ എന്ന ഒരു പുതിയ ഹ്രസ്വചിത്രത്തിന്റെ ടീസറാണിത്. ഗൗതം വാസുദേവ മേനോൻ തന്നെയാണ് ചിത്രം സംവിധാനം ചെയ്യുന്നത്. ചിത്രത്തിന്റെ രണ്ടാം ഭാഗത്തെ കുറിച്ചുള്ള സൂചനയാണോ ഇതെന്ന് വ്യക്തമല്ല. ചിത്രം ഉടനെത്തുമെന്നും കാത്തിരിക്കാനും ഗൗതം മേനോൻ പറയുന്നു.