സൂര്യയും അപർണാ ബാലമുരളിയും പ്രധാനവേഷങ്ങളിലെത്തിയ ‘സൂരറൈ പോട്ര്‘ഏറെ പ്രേക്ഷകരെ നേടിയ ചിത്രമാണ്. എയർ ഡെക്കാൻ ഉടമയായ ക്യാപ്റ്റൻ ജി ആർ ഗോപിനാഥന്റെ ജീവിതത്തിൽ നിന്നും പ്രചോദനം ഉൾക്കൊണ്ടാണ് ചിത്രം ഒരുക്കിയത്. തമിഴ്‌നാട്ടിലെ ഗ്രാമീണ യുവാവായ നെടുമാരന്റെ സ്വപ്‌നങ്ങളെ എത്തിപ്പിടിക്കാനുള്ള യാത്രയുടെ കഥയാണ് ചിത്രത്തിൽ അവതരിപ്പിച്ചിരിക്കുന്നത്. 

ബൊമ്മി എന്ന വേഷത്തിലെത്തി മികച്ച പ്രകടനം കാഴ്ചവച്ചത് മലയാളത്തിന്റെ പ്രിയനടി അപർണയാണ്. ബൊമ്മിയുടെ ബേക്കറിയെ പറ്റിയുള്ള വാർത്തയാണ് ഇപ്പോൾ ശ്രദ്ധനേടുന്നത്. ക്യാപ്റ്റൻ ഗോപിനാഥിൻറെ ജീവിതത്തിൽ താങ്ങായി നിന്നത് ഭാര്യ ഭാർഗവി ഗോപിനാഥാണ്(ബൊമ്മി). ചിത്രത്തിലെതു പോലെ സ്വന്തമായൊരു ബേക്കറി തുടങ്ങുകയും അതിനെ വലിയൊരു സംരംഭമായി വളർത്തുകയുമായിരുന്നു ഭാർ​ഗവി. ‘ബൺ വേൾഡ് അയ്യങ്കാർ ബേക്കറി‘ എന്നാണ് ഭാർ​ഗവിയുടെ യഥാർത്ഥ ബേക്കറിയുടെ പേര്. 

ഇപ്പോഴിതാ ബൺവേൾഡിന് 25 വയസ്സ് ആയിരിക്കുകയാണ്. ക്യാപ്റ്റൻ ഗോപിനാഥാണ് ഭാര്യയുടെ ബേക്കറി പ്രവർത്തനമാ‌രംഭിച്ചിട്ട് 25 വർഷമായെന്ന് അറിയിച്ചത്. ജീവിതത്തിലൊരിക്കലും സ്വപ്നത്തെ കൈവിടാതെ മുന്നേറുന്ന പങ്കാളിക്ക് അഭിനന്ദനങ്ങൾ കുറിച്ചിരിക്കുകയാണ് അദ്ദേഹം.