ലോക്ക്ഡൗണിൽ രാജ്യത്തെ സിനിമ മേഖല ഒന്നടങ്കം തകർന്നപ്പോൾപോലും ഒന്നിനു പുറകെ ഒന്നായി ചിത്രങ്ങൾ പുറത്തിറക്കി ആരാധകരെ ഞെട്ടിച്ച സംവിധായകനാണ് രാം ​ഗോപാൽ വർമ. തന്റെ സ്വന്തം ഒടിടി പ്ലാറ്റ്ഫോമിലൂടെയായിരുന്നു റിലീസുകളെല്ലാം. ഇപ്പോൾ തീയെറ്റർ തുറക്കാനുള്ള കേന്ദ്രസർക്കാരിന്റെ തീരുമാനം വന്നതോടെ പുതിയ ചിത്രത്തിന് തീയെറ്റർ റിലീസ് പ്രഖ്യാപിച്ചിരിക്കുകയാണ് ആർജിവി. 

ഒക്ടോബര്‍ 15ന് തീയെറ്റർ വീണ്ടും തുറക്കുമ്പോള്‍ റിലീസ് ചെയ്യപ്പെടുന്ന ആദ്യ ചിത്രം തന്റേതായിരിക്കുമെന്നാണ് അദ്ദേഹം ട്വീറ്റ് ചെയ്തത്.  മെയ് മാസത്തിലാണ് കൊറോണ രോ​ഗബാധയെക്കുറിച്ചുള്ള ചിത്രം പുറത്തിറക്കുമെന്ന് അദ്ദേഹം അറിയിച്ചത്. കൊറോണ വൈറസ് എന്ന് പേരിട്ടിരിക്കുന്ന ചിത്രത്തിന്റെ കൃത്യമായ റിലീസ് തിയതി അദ്ദേഹം പ്രഖ്യാപിച്ചിട്ടില്ല.  ലോകത്തിലെ ആദ്യത്തെ കൊറോണ വൈറസ് സിനിമ എന്നായിരുന്നു രാം ​ഗോപാൽ വർമ ചിത്രത്തിന് നൽകിയ വിശേഷണം. ചിത്രത്തിന്റെ ട്രെയിലറും നേരത്തെ പുറത്തുവന്നിരുന്നു. 

കൊവിഡ് കാലത്ത് നിരവധി ചിത്രങ്ങള്‍ പ്രഖ്യാപിച്ചിരുന്ന രാം ഗോപാല്‍ വര്‍മ്മ ഏറ്റവുമൊടുവില്‍ പ്രഖ്യാപിച്ചത് സ്വന്തം ജീവചരിത്രചിത്രം ആണ്. മൂന്ന് ഭാഗങ്ങളിലായി ആറ് മണിക്കൂര്‍ ദൈര്‍ഘ്യത്തില്‍ ഒരുങ്ങുന്ന സിനിമയുടെ ചിത്രീകരണം കഴിഞ്ഞ മാസം 16ന് ആരംഭിച്ചിരുന്നു. ഇതു കൂടാതെ ഒരു ലസ്ബിയൻ ത്രില്ലർ ചിത്രവും അർണവ് ​ഗോ‌സ്വാമിയെക്കുറിച്ചുള്ള ചിത്രവും പ്രഖ്യാപിച്ചിട്ടുണ്ട്.