വർഷങ്ങൾക്ക് മുൻപ് സം​ഗീത പ്രേമികളുടെ ഡ്രോയറുകൾ നിറഞ്ഞിരുന്നത് കാസറ്റുകൾ കൊണ്ടായിരുന്നു. ഇഷ്ട ​ഗാനങ്ങളുടെ കാസറ്റുകൾ വാങ്ങി സൂക്ഷിച്ചിരുന്നവർ നിരവധിയാണ്. എന്നാൽ ഡിജിറ്റൽ രം​ഗം ശക്തമായതോടെ മൊബൈലിൽ ഒരു വിരൽ തുമ്പിൽ ഏത് പാട്ടും ലഭ്യമാകുന്ന അവസ്ഥയായി. എന്നാൽ പല വിദേശ രാജ്യങ്ങളും ഇപ്പോൾ വീണ്ടും കാസറ്റിലേക്ക് തിരിച്ചുപോയിക്കൊണ്ടിരിക്കുകയാണ്. ഇന്ത്യയും കാസറ്റിലേക്ക് തിരിച്ചുപോകുമോ എന്ന സംശയത്തിലാണ് ഇപ്പോൾ സംവിധായകനും ​ഗായകനുമായ വിനീത് ശ്രീനിവാസൻ. സോഷ്യൽ മീഡിയയിലൂടെയാണ് താരം ആരാധകരോട് അഭിപ്രായം ചോദിച്ചത്.

കുറേ നാളുകളായി നിങ്ങളോട് ഇത് ചോദിക്കണം എന്നു കരുതുന്നു. ഞങ്ങളുടെ സിനിമകളിലെ പാട്ടുകളുടെ ഓഡിയോ കാസറ്റ് പുറത്തിറക്കിയാൽ ആരെങ്കിലും വാങ്ങാൻ തയാറാകുമോ? ചില വിദേശ രാജ്യങ്ങളിലേതുപോലെ ഇന്ത്യയിലും ഓഡിയോ കാസറ്റുകൾ തിരിച്ചുവരുമെ‌ന്ന് ആരെങ്കിലും കരുതുന്നുണ്ടോ? പഴയ കാലത്തെപ്പോലെ ഫിസിക്കൽ കോപ്പികൾ സൂക്ഷിക്കാൻ ആ​ഗ്രഹിക്കുന്നവരുണ്ടോ? പാട്ടുകൾ കേൾക്കാൻ വാക്ക്മാനും കാസറ്റ് പ്ലേയറും ഇപ്പോഴും ഉപയോ​ഗിക്കുന്നവരുണ്ടോ? ഒരുപാട് ചോദ്യങ്ങളുണ്ടെന്ന് എനിക്കറിയാം. പക്ഷേ അഭിപ്രായങ്ങൾ അറിയുന്നതിനു വേണ്ടിയാണ് ഞാനിത് ചോദിക്കുന്നത്- വിനീത് കുറിച്ചു. 

നിരവധി സം​ഗീത പ്രേമികളാണ് താരത്തിന് മറുപടി നൽകിയിരിക്കുന്നത്. എന്നാൽ ഭൂരിഭാ​ഗം പേരും പറയുന്നത് കാസറ്റ് പുറത്തിറക്കുന്നത് ഒരിക്കലും വിജയകരമാവില്ല എന്നു തന്നെയാണ്. അതിനിടെ ഇന്ത്യൻ ക്രിക്കറ്റ് താരം സഞ്ജു സാംസണും മറുപടിയുമായി എത്തി. നിങ്ങൾ കാസറ്റുകൾ പുറത്തിറക്കുകയാണെങ്കിൽ ഞാൻ ഒരെണ്ണം ഉറപ്പായും വാങ്ങും എന്നായിരുന്നു സഞ്ജു കുറിച്ചത്. നിറയെ ഹൃദയ ചിഹ്നങ്ങൾക്കൊപ്പം സഞ്ജു എന്നായിരുന്നു കമന്റിന് വിനീത് മറുപടി നൽകിയത്.