കഴിഞ്ഞ ദിവസമാണ് മലയാളത്തിന്റെ പ്രിയ താരങ്ങളായ മമ്മൂട്ടിയും മോഹൻലാലും ദുബായിലേക്ക് പോയത്. യുഎഇ ഗോള്‍ഡന്‍ വിസ സ്വീകരിക്കുന്നതിന് വേണ്ടിയായിരുന്നു ഇരുവരുടേയും വിദേശ യാത്ര. ഇപ്പോൾ സോഷ്യൽ മീഡിയയിൽ വൈറലാവുന്നത് ദുബായിൽ നിന്നുള്ള മോഹൻലാലിന്റേയും മമ്മൂട്ടിയുടേയും ചിത്രങ്ങളാണ്. 

ഒരു വിവാഹ ചടങ്ങിൽ പങ്കെടുക്കുന്ന ഇരുവരുടേയും ചിത്രങ്ങളാണ് പുറത്തുവന്നത്. ഓറഞ്ച് ഷർട്ട് ധരിച്ച് സിംപിളായാണ് മ‌മ്മൂട്ടി എത്തിയത്. മോഹൻലാൽ സ്യൂട്ടും കോട്ടും അണിഞ്ഞ് സ്റ്റൈലിഷ് ലുക്കിലാണ് വിവാഹത്തിൽ പങ്കെടുത്തത്. വ്യവസായി യൂസഫലിയേയും ചിത്രത്തിൽ കാണാം. 

യുഎഇ ഗോള്‍ഡന്‍ വിസ സ്വീകരിക്കാൻ രണ്ട് ദിവസം മുൻപാണ് മമ്മൂട്ടിയും മോ​ഹൻലാലും എത്തിയത്. വിവിധ മേഖലകളില്‍ സംഭാവന നല്‍കിയ വ്യക്തികള്‍ക്കാണ് യുഎഇ ഗോള്‍ഡന്‍ വിസ നല്‍കുന്നത്. മലയാള സിനിമയില്‍ നിന്നുള്ള വ്യക്തികള്‍ക്ക് ഗോള്‍ഡന്‍ വിസ ലഭിക്കുന്നത് ഇതാദ്യമായാണ്. ഇതിന് മുമ്പ് ഇന്ത്യന്‍ സിനിമയില്‍ നിന്ന് ഷാറൂഖ് ഖാന്‍, സഞ്ജയ് ദത്ത് എന്നിവര്‍ക്ക് ഗോള്‍ഡന്‍ വിസ ലഭിച്ചിരുന്നു.