അനുവാദമില്ലാതെ സ്വകാര്യ ചിത്രങ്ങൾ പകർത്തി പ്രസിദ്ധപ്പെടുത്തിയതിന് എതിരെ ബോളിവുഡ് നടി അനുഷ്ക ശർമ രം​ഗത്ത്. സോഷ്യൽ മീഡിയയിലൂടെയായിരുന്നു താരത്തിന്റെ പ്രതികരണം. ഭർത്താവ് വിരാട് കൊഹ് ലിക്കൊപ്പം ബാൽക്കണിയിൽ ഇരിക്കുന്ന ചിത്രമാണ് ഇരുവരുടേയും അനുമതിയില്ലാതെ ഒരു മാധ്യമം പ്രസിദ്ധീകരിച്ചത്. ഇത്  പങ്കുവെച്ചുകൊണ്ട് തങ്ങളുടെ സ്വകാര്യത മാനിക്കണം എന്നാണ് താരം കുറിച്ചത്. 

ഫോട്ടോ​ഗ്രാഫറോടും പബ്ലിക്കേഷനോടും പലപ്രാവശ്യം പറഞ്ഞിട്ടും അവർ ഇപ്പോഴും ഞങ്ങളുടെ സ്വകാര്യതയിലേക്ക് കടന്നു കയറുകയാണ്, ഇപ്പോൾ നിങ്ങളിത് അവസാനിപ്പിക്കണം- അനുവാദമില്ലാതെ ചിത്രീകരിച്ച ഫോട്ടോ പങ്കുവെച്ചുകൊണ്ട് അനുഷ്ക കുറിച്ചു. സംസാരിച്ചുകൊണ്ട് വീടിനുള്ളിൽ ഇരിക്കുന്ന അനുഷ്കയേയും കൊഹ് ലിയേയുമാണ് വിഡിയോയിൽ കാണുന്നത്. 

നിരവധി പേരാണ് താരത്തിന് പിന്തുണയുമായി രം​ഗത്തെത്തിയിരിക്കുന്നത്.  തന്റെ ആദ്യത്തെ കൺമണിക്കായുള്ള കാത്തിരിപ്പിലാണ് അനുഷ്കയും കൊഹ് ലിയും. ജനുവരിയിൽ കുഞ്ഞതിഥി എത്തുമെന്ന് താരം നേരത്തെ പറഞ്ഞിരുന്നു. അനുഷ്കയുടെ പ്രസവത്തെ തുടർന്ന് ഓസ്ട്രേലിയൻ പരമ്പര പാതിയിൽ ഉപേക്ഷിച്ച് കൊഹ് ലി നാട്ടിൽ എത്തിയിരുന്നു.