മാലിക്കിലെ ഫഹദ് ഫാസിലിന്റെ മിന്നും പ്രകടനമാണ് ഇപ്പോൾ സിനിമാപ്രേമികളുടെ മനം കവരുന്നത്. ഒടിടി റിലീസ് ചെയ്തതിനാൽ ചിത്രം കേരളത്തിൽ മാത്രമല്ല അന്യ ഭാഷകളിലും ശ്രദ്ധേയമാവുകയാണ്. നിരവധി പ്രമുഖരാണ് താരത്തിനെ പ്രശംസിച്ചുകൊണ്ട് രംഗത്തെത്തിയത്. അതിനിടെ ചിത്രത്തിന്റെ ഒരു ലൊക്കേഷൻ വിഡിയോ ആണ് ശ്രദ്ധേയമാകുന്നത്.
വെടിവയ്പ്പിന് ഇടയിലൂടെ മകന്റെ അടുത്തേക്ക് ഓടുന്ന ഫഹദിന്റെ രംഗം ചിത്രീകരിക്കുന്നതിന്റെ അണിയറ വിഡിയോ ആണ് പുറത്തുവന്നത്. ബുള്ളറ്റുകൾക്കിടയിലൂടെ ഓടുന്ന ഫഹദാണ് വിഡിയോയിൽ. അതിനിടെ തട്ടിത്തെറിച്ച് താഴ്ചയിലേക്ക് വീഴുകയാണ് താരം.
മാലിക്കിന്റെ നിർമാതാവ് ആന്റോ ജോസഫാണ് വിഡിയോ പുറത്തുവിട്ടത്. റിസ്ക് എടുത്തുകൊണ്ടുള്ള ഫഹദിന്റെ അഭിനയത്തെ പ്രശംസിച്ചുകൊണ്ടാണ് വിഡിയോ പങ്കുവെച്ചത്. ചുറ്റും വലിയ വെടിവയ്പ്പ് നടക്കുകയാണെന്ന് കാണിക്കാന്‍ സെറ്റിന്റെ ചുമരുകളില്‍നിന്നും നിലത്തുനിന്നും പൊട്ടിത്തെറികളുണ്ടാകുമ്പോള്‍ രംഗത്തിന് വിശ്വസനീയമാക്കാന്‍ റിസ്‌കെടുത്ത് പൂര്‍ണ സമര്‍പ്പണത്തോടെയാണ് ഫഹദ് ഓടുന്നത്. സ്വന്തം പ്രകടനത്തിലൂടെ ഇപ്പോഴത്തെ സിനിമ ഇന്റസ്ട്രിയില്‍ വ്യത്യസ്തനായി നില്‍ക്കുന്നത് ഇതൊക്കെക്കൊണ്ടാണ്‌.- ആന്റോ ജോസഫ് കുറിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ