ഹോളിവുഡ് താരവും ഓസ്കർ, എമ്മി പുരസ്കാര ജേതാവുമായ ലൂയിസ് ​​ഗോസെ ജൂനിയർ (87) അന്തരിച്ചു. കാലിഫോർണിയയിലെ സാന്റാ മോണിക്കയിലായിരുന്നു അന്ത്യം. മരണ കാരണം വ്യക്തമായിട്ടില്ല. മരണവിവരം ഒരു പ്രസ്താവനയിലൂടെ കുടുംബം സ്ഥിരീകരിച്ചു.

സഹനടനുള്ള ഓസ്കർ നേടുന്ന കറുത്തവർ​ഗക്കാരനായ ആദ്യ നടനാണ് ലൂയിസ് ​​ഗോസെ ജൂനിയർ. ആൻ ഓഫീസർ ആൻഡ് എ ജെന്റിൽമാൻ എന്ന ചിത്രത്തിലെ പ്രകടനത്തിനായിരുന്നു ലൂയിസ് ​ഗോസെയ്ക്ക് പുരസ്കാരം ലഭിച്ചത്. ഇതേ ചിത്രത്തിലെ അഭിനയത്തിന് ​ഗോൾഡൻ ​ഗ്ലോബ് പുരസ്കാരവും ​ഗോസെയെ തേടിയെത്തി. റൂട്ട്സ് എന്ന വി മിനി സീരീസിലൂടെ എമ്മി പുരസ്കാരവും അദ്ദേ​ഹം സ്വന്തമാക്കി.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

ആൻ ആക്ടർ ആൻഡ് എ ജെന്റിൽമാൻ എന്നുതന്നെയായിരുന്നു അദ്ദേഹത്തിന്റെ ഓർമക്കുറിപ്പിന്റെയും പേര്. 'എല്ലാത്തിനുമുപരിയായി, ഒരു കറുത്തവർ​ഗക്കാരനായ നടൻ എന്ന നിലയിലുള്ള എൻ്റെ സ്ഥാനത്തിൻ്റെ വലിയ സ്ഥിരീകരണമായിരുന്നു അത്' എന്നാണ് തനിക്ക് ലഭിച്ച ഓസ്കറിനേക്കുറിച്ച് 2010-ൽ പുറത്തിറങ്ങിയ ഈ പുസ്തകത്തിൽ ​ഗോസെ എഴുതിയത്. 2010-ൽ താരത്തിന് പ്രോസ്റ്റേറ്റ് കാൻസർ ഉണ്ടെന്ന് കണ്ടെത്തിയിരുന്നു. എന്നാൽ പ്രാരംഭ ഘട്ടത്തിൽ രോഗനിർണയം നടത്തിയതിനാൽ പൂർണമായി സുഖം പ്രാപിക്കുമെന്ന് പ്രതീക്ഷിക്കുന്നതായി മുമ്പ് വെളിപ്പെടുത്തിയിരുന്നു.