ന്യൂഡല്‍ഹി :  ബാങ്ക് അക്കൗണ്ടും പാന്‍ കാര്‍ഡും ആധാറുമായി ബന്ധിപ്പിക്കുന്നതിനുള്ള കാലാവധി നീട്ടി. ഇനി ഒരു ഉത്തരവ് ഉണ്ടാകുന്നതുവരെയാണ് നീട്ടിയത്. നേരത്തെ ഡിസംബര്‍ 31 നകം ആധാറുമായി ബന്ധിപ്പിക്കണമെന്നായിരുന്നു കേന്ദ്രസര്‍ക്കാര്‍ അറിയിച്ചിരുന്നത്. ആധാറുമായി ബന്ധിപ്പിക്കുന്നത് മാര്‍ച്ച് 31 വരെ നീട്ടാന്‍ തയ്യാറാണെന്ന് കേന്ദ്രസര്‍ക്കാര്‍ കഴിഞ്ഞയാഴ്ച സുപ്രീംകോടതിയില്‍ വ്യക്തമാക്കിയിരുന്നു. 

എന്നാല്‍ ആധാറുമായി ബന്ധപ്പെട്ട കേസില്‍ നിര്‍ണായകവാദം നാളെ തുടങ്ങാനിരിക്കുന്ന സാഹചര്യത്തിലാണ്, ആധാറും ബാങ്ക് അക്കൗണ്ടുമായി ബന്ധിപ്പിക്കലിനുള്ള തീയതി അനിശ്ചിതമായി നീട്ടിയതെന്നാണ് സൂചന. ബാങ്ക് അക്കൗണ്ട്, മ്യൂച്ചല്‍ ഫണ്ട് ഫോളിയോ, ഇന്‍ഷുറന്‍സ് പോളിസി തുടങ്ങിയവ ഡിസംബര്‍ 31 ന് അകം ആധാറുമായി ബന്ധിപ്പിക്കണമെന്ന് നിര്‍ദേശിച്ചിരുന്നു. 

കള്ളപ്പണം തടയുന്നതിന് കൊണ്ടുവന്ന നിയമത്തിന്റെ ഭാഗമായാണ് ആധാര്‍ ലിങ്ക് ചെയ്യുന്നത് കേന്ദ്രസര്‍ക്കാര്‍ നിര്‍ബന്ധമാക്കിയത്. അതേസമയം മൊബൈല്‍ നമ്പറും ആധാറുമായി ബന്ധിപ്പിക്കുന്നതിനുള്ള തീയതിയില്‍ കേന്ദ്രം മാറ്റം വരുത്തിയിട്ടില്ല.