ന്യൂഡല്‍ഹി: രാജ്യത്തെ സര്‍ക്കാര്‍ ഡോക്ടര്‍മാരുടെ വിരമിക്കല്‍ പ്രായം 65 വയസാക്കി ഉയര്‍ത്തി കേന്ദ്രസര്‍ക്കാര്‍ ഉത്തരവ്. നിലവില്‍ ഡോക്ടര്‍മാരുടെ വിരമിക്കല്‍ പ്രായം 60 വയസാണ്. കേന്ദ്ര നിയമമന്ത്രി രവിശങ്കര്‍ പ്രസാദാണ് ഇക്കാര്യം അറിയിച്ചത്. പ്രധാനമന്ത്രി നരേന്ദ്ര മോദിയുടെ നേതൃത്വത്തില്‍ ചേര്‍ന്ന കേന്ദ്രമന്ത്രിസഭാ യോഗമാണ് ഇക്കാര്യത്തില്‍ തീരുമാനമെടുത്തത്.

എന്നാല്‍ ഈ തീരുമാനം കേന്ദ്ര ആരോഗ്യ സര്‍വീസിലുള്ള ഡോക്ടര്‍മാര്‍ക്ക് ബാധകമാകില്ലെന്നും മന്ത്രി വ്യക്തമാക്കി. ഈ വര്‍ഷം ജൂലൈയില്‍ സിആര്‍പിഎഫ്, ബിഎസ്എഫ് തുടങ്ങിയ അര്‍ദ്ധ സൈനിക വിഭാഗങ്ങളില്‍ പ്രവര്‍ത്തിച്ചിരുന്ന മെഡിക്കല്‍ ഉദ്യോഗസ്ഥരുടെ വിരമിക്കല്‍ പ്രായം 65ലേക്ക് ഉയര്‍ത്തിയിരുന്നു.

സര്‍ക്കാര്‍ ഡോക്ടര്‍മാരുടെ വിരമിക്കല്‍ പ്രായം 65 വയസാക്കി ഉയര്‍ത്തുമെന്ന് എന്‍ഡിഎ സര്‍ക്കാരിന്റെ രണ്ടാം വാര്‍ഷികാഘോഷങ്ങളുടെ ഭാഗമായി ഉത്തര്‍പ്രദേശിലെ സഹറന്‍പൂരില്‍ സംഘടിപ്പിച്ച റാലിയില്‍ പ്രധാനമന്ത്രി പ്രഖ്യാപിച്ചിരുന്നു.