ന്യൂഡൽഹി :  രാജ്യത്തെ പ്രമുഖരുടെ ജീവിതം ആസ്പദമാക്കി നിരവധി  സിനിമകളാണ് ഇറങ്ങിക്കൊണ്ടിരിക്കുന്നത്. സമീപകാലത്ത് എല്ലാവരും ആകാംക്ഷയോടെ കാത്തിരിക്കുന്ന ചിത്രമാണ്  മുൻ പ്രധാനമന്ത്രി മൻമോഹൻ സിങിന്റെ രാഷ്ട്രീയ ജീവിതം ആസ്പദമാക്കിയുള്ള ‘ദി ആക്സിഡൻഷ്യൽ പ്രെെംമിനിസ്റ്റർ’. ഇതിന്റെ ട്രെയിലർ പുറത്തുവന്നതോടെ  ചിത്രത്തെക്കുറിച്ചുള്ള വാദപ്രതിവാദങ്ങളും കൊഴുക്കുകയാണ്. 

ഇതിനിടെ പ്രധാനമന്ത്രി നരേന്ദ്രമോദിയുടെ രാഷ്ട്രീയ ജീവിതം ആസ്പദമാക്കി സിനിമയെടുക്കുമെന്ന പരിഹാസവുമായി ജി​ഗ്നേഷ് മേവാനി രം​ഗത്തെത്തി. ചിത്രത്തിന്റെ പേര് ‘കാവൽക്കാരൻ കള്ളനാണ്’ എന്നായിരിക്കും. മോദിയുടെയും ബിജെപിയുടെയും  യഥാർഥ മുഖം തുറന്നുകാട്ടുമെന്നും മേവാനി പറഞ്ഞു.

ഇത്തരത്തിലൊരു ചിത്രം പുറത്തുവന്നാൽ ഷാരൂഖ്-സൽമാൻ-ആമിർ ഖാൻമാരുടെ ചിത്രങ്ങൾ നേടുന്നതിനേക്കാൾ പണം മോദി പടം നേടുമെന്നും മേവാനി പരിഹസിച്ചു. പ്രധാനമന്ത്രി എന്ന നിലയിൽ നരേന്ദ്രമോദി വൻപരാജയമാണ്. വാചക കസർത്തു കൊണ്ട് പിടിച്ചു നിൽക്കുന്ന തന്ത്രമാണ് മോദിയും ബിജെപിയും നടപ്പിലാക്കുന്നതെന്നും അദ്ദേഹം ആരോപിച്ചു.