ശ്രീനഗര്‍: ജമ്മുകശ്മീരിലെ ഷോപ്പിയാനില്‍ നിന്ന് തീവ്രവാദികള്‍ തട്ടിക്കൊണ്ടുപോയ പൊലീസ് കോണ്‍സ്റ്റബിളിനെ കൊല്ലപ്പെട്ട നിലയില്‍ കണ്ടെത്തി. ജാവേദ് അഹമ്മദ് എന്ന കോണ്‍സ്റ്റബിളാണ് കൊല്ലപ്പെട്ടത്. ഇന്ന് രാവിലെയാണ് മൃതദേഹം കണ്ടെത്തിയത്. ഷോപിയാനിലെ ദന്‍ഗമില്‍ വെടികൊണ്ട് മുറിവേറ്റ നിലയിലായിരുന്നു മൃതദേഹം കാണപ്പെട്ടത്.
കച്ച്ദ്വാരയിലുള്ള വീട്ടിലേക്ക് അതിക്രമിച്ച് കയറിയാണ് തീവ്രവാദികള്‍ ജാവേദിനെ തട്ടിക്കൊണ്ട് പോയത്. നാല് പേരടങ്ങിയ സംഘമായിരുന്നു ഇദ്ദേഹത്തെ തട്ടിക്കൊണ്ട് പോയത്. ഏപ്രിലില്‍ അഞ്ച് തീവ്രവാദികളെ സുരക്ഷാ സൈന്യം കൊലപ്പെടുത്തിയത് ഈ ഗ്രാമത്തില്‍ വെച്ചായിരുന്നു. പ്രദേശത്ത് ശക്തമായ തെരച്ചില്‍ നടത്തിയെങ്കിലും കോണ്‍സ്റ്റബിളിനെ കണ്ടെത്താനായിരുന്നില്ല.
അടുത്തിടെ പുല്‍വാമയില്‍ നിന്നും തട്ടിക്കൊണ്ട് പോയ ഔറന്‍ഗസേബ് എന്ന സൈനികനെ തീവ്രവാദികള്‍ കൊലപ്പെടുത്തിയിരുന്നു. ഇതിന് പിന്നാലെയാണ് റംസാന്‍ മാസത്തില്‍ താഴ്‌വരയില്‍ ഏര്‍പ്പെടുത്തിയിരുന്ന വെടിനിറുത്തല്‍ റദ്ദാക്കാന്‍ സൈന്യം തീരുമാനിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ