വിശാഖപട്ടണം: പ്രധാനമന്ത്രിക്കസേരയ്ക്കും രാഹുല്‍ ഗാന്ധിക്കുമിടയില്‍ ഒറ്റ തടസ്സമേയുള്ളുവെന്നാണ് ടിഡിപി എംപി ജെ സി ദിവാകര്‍ റെഡ്ഡിയുടെ അഭിപ്രായം. ഒരു നല്ല ബ്രാഹ്മണപ്പെണ്‍കുട്ടിയെ വേളികഴിച്ചാല്‍ പിന്നെല്ലാം മംഗളമാണെന്നാണ് മുന്‍ കോണ്‍ഗ്രസ് നേതാവ് കൂടിയായ റെഡ്ഡിയുടെ പക്ഷം.
ഉത്തര്‍പ്രദേശിലെ ബ്രാഹ്മണരുടെ പിന്തുണ ഉറപ്പാക്കാന്‍ ഇതുവഴി കഴിയും .2014 മുതല്‍ താനിത് പറയുന്നതാണെന്നും പക്ഷേ സോണിയ ഗാന്ധി കാര്യമാക്കിയില്ലെന്നും വിശാഖപട്ടണത്ത് നടന്ന പൊതു സമ്മേളനത്തില്‍ റെഡ്ഡി പറഞ്ഞു.
രാഹുല്‍ ഗാന്ധിക്ക് യുപിയിലെ ബ്രാഹ്മണരുടെ പിന്തുണയില്ലാതെ ഒരിക്കലും പ്രധാനമന്ത്രിക്കസേരയിലേക്ക് എത്താന്‍ കഴിയില്ല. യുപി ഭരിക്കുന്നത് തന്നെ അവരാണ് എന്നും അദ്ദേഹം പറഞ്ഞു.
അനന്ത്പൂര്‍ ലോക്‌സഭാ മണ്ഡലത്തില്‍ നിന്നുള്ള എംപിയാണ് റെഡ്ഡി. 2014 ലെ പൊതു തിരഞ്ഞെടുപ്പിന് മുമ്പാണ് റെഡ്ഡി കോണ്‍ഗ്രസ് വിട്ട് തെലുങ്ക് ദേശം പാര്‍ട്ടിയിലേക്ക് മാറിയത്. ആറ് തവണ കോണ്‍ഗ്രസ് എംഎല്‍എയായിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ