ന്യൂഡല്‍ഹി: രാജ്യത്തെ വിവിധ സംസ്ഥാനങ്ങളിലെ നിയമസഭകളിലേക്ക് ഡിസംബറില്‍ നടക്കാനിരിക്കുന്ന തിരഞ്ഞെടുപ്പില്‍ മത്സരിക്കുന്നവരുടെ പട്ടിക ബിജെപി പുറത്ത് വിട്ടു. മധ്യപ്രദേശിലെ 177 സീറ്റുകളിലും തെലങ്കാനയിലെ 28 ഉം മിസോറാമിലെ 24 ഉം സീറ്റുകളിലേക്കുള്ള സ്ഥാനാര്‍ത്ഥികളെയാണ് പ്രഖ്യാപിച്ചത്. 

ജിതേന്ദ്ര ഗലോട്ട്, യശോധരാ രാജെ സിന്ധ്യെ, നരോത്തം മിശ്ര എന്നിവരാണ് മധ്യപ്രദേശില്‍ നിന്ന് ജനവിധി തേടുന്ന പ്രമുഖര്‍. വ്യാപം അഴിമതിക്കേസില്‍ ആരോപണ വിധേയനായ മന്ത്രി ലക്ഷ്മികാന്ത് ശര്‍മ്മയുടെ സഹോദരനായ ഉമാക്രാന്ത് ശര്‍മ്മയ്ക്ക് ബിജെപി സീറ്റ് വാഗ്ദാനം ചെയ്തിട്ടുണ്ട്. സിര്‍നോജ് മണ്ഡലമാണ് ഉമാക്രാന്തിന് നല്‍കിയത്. ലക്ഷ്മികാന്തിന് തന്നെ സിര്‍നോജ് മണ്ഡലം നല്‍കുമെന്ന് നേരത്തേ അഭ്യൂഹങ്ങളുണ്ടായിരുന്നു. 1993 മുതല്‍ 2008 വരെ ഉമാക്രാന്താണ് മണ്ഡലത്തെ പ്രതിനിധീകരിച്ചിരുന്നത്. വ്യാപം അഴിമതിക്ക് പിന്നാലെ 2013 ലെ തിരഞ്ഞെടുപ്പില്‍ ഉമാക്രാന്ത് ദയനീയമായി പരാജയപ്പെട്ടിരുന്നു. 

ബിജെപിയുടെ കേന്ദ്ര തിരഞ്ഞെടുപ്പ് കമ്മീഷന്‍ യോഗം ചേര്‍ന്നാണ് സ്ഥാനാര്‍ത്ഥിപ്പട്ടിക പുറത്ത് വിട്ടത്. കോണ്‍ഗ്രസും ഇന്ന് പട്ടിക പുറത്ത് വിടുമെന്ന് നേരത്തേ വ്യക്തമാക്കിയിരുന്നു.