ന്യൂഡല്‍ഹി: പ്രതിപക്ഷ പാര്‍ട്ടികളുടെ സഖ്യരൂപികരണ ശ്രമത്തില്‍ പ്രതികരണവുമായി പ്രധാനമന്ത്രി നരേന്ദ്ര മോദി. രാജ്യത്തിന്റെ തലവര മാറ്റുവാനാണ് ബിജെപി ശ്രമിക്കുന്നത്. എന്നാല്‍ തങ്ങളുടെ ഭരണ വംശത്തെ നിലനിര്‍ത്താനാണ് മറ്റ് ചില രാഷ്ട്രീയ പാര്‍ട്ടികളുടെ ശ്രമം എന്ന് മോദി പറഞ്ഞു. 

എകെ47നില്‍ നിന്നും വെടിയുതിര്‍ക്കുന്ന കണക്കെയാണ് ചില പ്രതിപക്ഷ പാര്‍ട്ടി നേതാക്കള്‍ കള്ളം പറയുന്നത്. പ്രതിപക്ഷ പാര്‍ട്ടികളുടെ സഖ്യരൂപീകരണത്തില്‍ ശ്രദ്ധ കൊടുക്കേണ്ടതില്ല. നമ്മുടെ പട്ടാളത്തെ അപമാനിക്കുകയും, രാജ്യത്തിന്റെ നേട്ടങ്ങളെ അപകീര്‍ത്തിപ്പെടുത്തുകയും ചെയ്യുന്ന പ്രതിപക്ഷ പാര്‍ട്ടികളെ ജനങ്ങള്‍ വെറുത്തുകൊള്ളുമെന്നും മോദി പറഞ്ഞു. 

പേരെടുത്ത് പറയാതെയായിരുന്നു പ്രധാനമന്ത്രിയുടെ വിമര്‍ശനം എങ്കിലും കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയെ തന്നെയാണ് മോദി ലക്ഷ്യം വെച്ചതെന്ന് വ്യക്തമാണ്. റാഫേല്‍ ഇടപാടുമായി ബന്ധപ്പെട്ട് രാഹുല്‍ നുണകള്‍ അനുദിനം പറയുകയാണെന്ന് നേരത്തേ ബിജെപി നേതാക്കള്‍ ആരോപിച്ചിരുന്നു.