ഹൈദരാബാദ് : തെലങ്കാന മുഖ്യമന്ത്രി കെ ചന്ദ്രശേഖര റാവുവിനെ ശ്രീരാമനായി ചിത്രീകരിച്ച് തെലങ്കാന രാഷ്ട്രസമിതി. രംഗറെഡ്ഡി ജില്ലയില്‍ ടിആര്‍എസ് നടത്തുന്ന വന്‍ റാലിയുടെ പ്രചരണാര്‍ത്ഥം വെച്ചിട്ടുള്ള ബോര്‍ഡിലാണ് മുഖ്യമന്ത്രിയെ ശ്രീരാമനാക്കിയത്. രംഗറെഡ്ഡി ജില്ലയില്‍ 2000 ഏക്കര്‍ സ്ഥലത്താണ് യോഗം സംഘടിപ്പിച്ചിരിക്കുന്നത്. 

തെലങ്കാന നിയമസഭ പിരിച്ചുവിട്ട് അസംബ്ലി തെരഞ്ഞെടുപ്പിന് ടിആര്‍എസ് ഒരുങ്ങിയേക്കുമെന്ന് റിപ്പോര്‍ട്ടുകളുണ്ട്. ഈ സാഹചര്യത്തില്‍ ടിആര്‍എസ് നടത്തുന്ന പ്രഗതി നിവേദന സഭ എന്ന പരിപാടി ഏറെ രാഷ്ട്രീയ ശ്രദ്ധ ആകര്‍ഷിച്ചിട്ടുണ്ട്. പാര്‍ട്ടി നേതാവില്‍ നിന്ന് സുപ്രധാന രാഷ് ട്രീയ പ്രഖ്യാപനം പ്രതീക്ഷിക്കാമെന്ന് മുഖ്യമന്ത്രി ചന്ദ്രശേഖര റാവുവിന്റെ മകനും ഐടി മന്ത്രിയുമായ കെ.ടി രാമറാവു വ്യക്തമാക്കിയിരുന്നു. 

2019 മെയ് വരെ ടിആര്‍എസ് സര്‍ക്കാരിന് കാലാവധിയുണ്ട്. കഴിഞ്ഞ തവണ പൊതുതിരഞ്ഞെടുപ്പിനൊപ്പമാണ് തെലങ്കാനയിലും നിയമസഭാ തിരഞ്ഞെടുപ്പ് നടന്നത്. സപ്തംബര്‍ രണ്ട് തെലങ്കാന തെലങ്കാന സംസ്ഥാനം രൂപവത്കരിച്ചതിന്റെ നാലാം വാര്‍ഷികമാണ്. നാല് വര്‍ഷത്തെ ഭരണനേട്ടങ്ങള്‍ വച്ച് വീണ്ടും ജയിച്ചുവരാമെന്നാണ് ടിആര്‍എസ് കണക്കുകൂട്ടുന്നത്.