റായ്പൂര്‍ : ഛത്തീസ്ഗഡില്‍ മാവോയിസ്റ്റുകളുമായുള്ള ഏറ്റുമുട്ടലില്‍ നാല് ബിഎസ്എഫ് ജവാന്മാര്‍ കൊല്ലപ്പെട്ടു. ഛത്തീസ് ഗഡിലെ കാന്‍കറിലാണ് ഏറ്റുമുട്ടലുണ്ടായത്. രണ്ട് ജവാന്‍മാര്‍ക്ക് പരിക്കേറ്റു. 

ലോക്‌സഭ തെരഞ്ഞെടുപ്പ് അടുത്തവേളയില്‍ സൈന്യം മാവോയിസ്റ്റ് വേട്ട ശക്തമാക്കുകയായിരുന്നു. ഛത്തീസ് ഗഡിലെ രാജ്‌നന്ദ്ഗാവ് ജില്ലയില്‍ കഴിഞ്ഞ മാസം 19 ന് വനിതാ മാവോയിസ്റ്റിനെ സൈന്യം വെടിവെച്ച് കൊന്നിരുന്നു. 

ഛത്തീസ്ഗഡില്‍ ഈ മാസം 11, 18, 23 തീയതികളിലാണ് വോട്ടെടുപ്പ് നടക്കുക. മാവോയിസ്റ്റ് ശക്തികേന്ദ്രങ്ങളായ രാജ്‌നന്ദ്ഗാവ്, മഹാസമുന്ദ്, കാന്‍കര്‍ എന്നിവിടങ്ങളില്‍ ഏപ്രില്‍ 18 നാണ് വോട്ടെടുപ്പ്.