ന്യൂഡല്‍ഹി: പ്രധാനമന്ത്രി നരേന്ദ്ര മോദിയുടെ ജനപ്രീതി കുത്തനെ ഇടിഞ്ഞതായി ഇന്ത്യാ ടുഡേ സര്‍വേ ഫലം. 2017 ജനുവരിയില്‍ 65 ശതമാനമായിരുന്നു മോദിയുടെ ജനപ്രിതിയെങ്കില്‍ 2019 ജനുവരിയോടെ ഇത് 46 ശതമാനമായി കുറഞ്ഞു. 

നോട്ട് നിരോധനം പ്രഖ്യാപിച്ചതിന് പിന്നാലെയാണ് ജനപ്രീതിയില്‍ മോദിക്ക് ഇടിവുണ്ടായത്. ഇതിനൊപ്പം തൊഴിലില്ലായ്മ, കാര്‍ഷിക മേഖലയിലെ തിരിച്ചടി, സാമ്പത്തിക മുന്നേറ്റമില്ലായ്മ എന്നിവയും മോദിക്ക് തിരിച്ചടിയായെന്ന് സര്‍വെയില്‍ പറയുന്നു.

എങ്കിലും ജനപ്രിയ നേതാക്കളില്‍ മോദി തന്നെയാണ് സര്‍വേയില്‍ ഒന്നാമത് നില്‍ക്കുന്നത്. രണ്ട് വര്‍ഷം കൊണ്ട് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ ജനപ്രീതിയും കുത്തനെ കൂടിയിട്ടുണ്ട്. 2017ല്‍ 10 ശതമാനമായിരുന്നത് 2019 ജനുവരിയോടെ 34 ശതമാനമാകുന്നു. ലോക്‌സഭാ തെരഞ്ഞെടുപ്പ് നടക്കുന്ന 97 മണ്ഡലങ്ങളിലെ 12000 വോട്ടര്‍മാര്‍ക്കിടയിലായിരുന്നു സര്‍വേ നടത്തിയത്.