ജബല്‍പൂര്‍ (മധ്യപ്രദേശ്): ഒന്നര വയസ്സുള്ള സ്വന്തം കുഞ്ഞിന്റെ കരച്ചിലില്‍ അസ്വസ്ഥനായ പിതാവ് മകളെ തറയില്‍ അടിച്ചു കൊന്നു. മദ്യലഹരിയിലെത്തിയ പ്രതി കുഞ്ഞിന്റെ കരച്ചില്‍ കേട്ട് അസ്വസ്ഥതനായി കുട്ടിയെ എടുത്ത് തല തറയില്‍ അടിച്ച് കൊലപ്പെടുത്തുകയായിരുന്നു. കൊലപാതകശേഷം കുഞ്ഞിന്റെ മൃതദേഹം സമീപത്തുള്ള അഴുക്കുചാലിനു അട‌ുത്തായി ഉപേക്ഷിച്ചു. സംഭവത്തില്‍ പിതാവിനെ പൊലീസ് അറസ്റ്റ് ചെയ്തു.
ഒന്നര വയസ്സുകാരി രുപാലിയെയാണ് വ്യാഴാഴ്ച രാത്രി പിതാവ് ക്രൂരമായി കൊലപ്പെടുത്തിയത്. ഭാര്യയെ നാലാമത്തെ പ്രസവത്തിനായി ആശുപത്രിയില്‍ പ്രവേശിപ്പിച്ച സമയത്താണ് കൊലപാതകം നടന്നത്. മധ്യപ്രദേശിലെ ജബല്‍പൂരിലാണ് സംഭവം.
വെള്ളിയാഴ്ച രാവിലെ മാലിന്യശുചീകരണ തൊഴിലാളികളാണ് മൃതദേഹം ഉപേക്ഷിക്കപ്പെട്ട നിലയില്‍ കണ്ടെത്തിയത്. ഇവർ ഉടൻതന്നെ പൊലീസിൽ വിവരമറിയിക്കുകയായിരുന്നു. തുടർന്ന് നടത്തിയ അന്വേഷണത്തിലാണ് ക്രൂരകൊലപാതകം കണ്ടെത്തിയത്. രുപാലിയെ കൂടാതെ മൂന്നും അഞ്ചും വയസ്സുള്ള രണ്ട് പെണ്‍മക്കളും ഇയാള്‍ക്കുള്ളതായി പൊലീസ് പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ