ഇംഫാല്‍: മണിപ്പൂരില്‍ പാര്‍ട്ടി വിപ്പ് ലംഘിച്ച് ബിജെപി സര്‍ക്കാരിന് എതിരായ നിലപാടെടുത്ത എട്ട് കോണ്‍ഗ്രസ് എംഎല്‍എമാരില്‍ ആറു പേര്‍ രാജിക്കത്ത് നല്‍കി. ആറ് പേര്‍ സ്പീക്കര്‍ക്കു രാജിക്കത്ത് നല്‍കിയതായി, പാര്‍ട്ടി വിട്ട ഒ ഹെന്റി സിങ് പറഞ്ഞു.
ഹെന്റി സിങ്ങിനു പുറമേ ഒയിനാം ലുഖോയി, മുഹമ്മദ് അബ്ദുല്‍ നാസിര്‍, പൂനം ബ്രോജന്‍, എന്‍ഗാങ് ഹോകിപ്, ഗുസാന്‍ഹു എന്നിവരാണ് രാജിനല്‍കിയത്. ഇബോബി സിങ്ങിന്റെ നേതൃത്വത്തില്‍ വിശ്വാസം നഷ്ടപ്പെട്ടതായും ഏറ്റവും വലിയ ഒറ്റക്കക്ഷിയായിട്ടും സര്‍ക്കാര്‍ രൂപീകരിക്കാനാവാത്തത് അദ്ദേഹത്തിന്റെ കഴിവുകേടാണന്നും വിമതര്‍ പറഞ്ഞു.
ഇന്നലെ ചേര്‍ന്ന സമ്മേളനത്തിലാണ് എന്‍ ബീരേന്‍ സിങ്ങിന്റെ നേതൃത്വത്തിലുള്ള ബിജെപി സര്‍ക്കാര്‍ വിശ്വാസ വോട്ട് നേടിയത്. 60 അംഗ സഭയില്‍ നിലവില്‍ സ്പീക്കര്‍ ഉള്‍പ്പെടെ 53 പേരാണ് ഉള്ളത്. ബിജെപി സഖ്യത്തിന് സ്പീക്കര്‍ അടക്കം 29 പേരുടെ പിന്തുണയുണ്ട്. കോണ്‍ഗ്രസിന് 24 അംഗങ്ങളാണ് ഉള്ളത്. ഇതിലെ എട്ടു പേരാണ് സഭയില്‍ എത്താതെ വിട്ടുനിന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ